Шығыс Қазақстан облысының әкімі Нұрымбет Сақтағанов өңірдің тұрғын үй-коммуналдық шаруашылығы қызметкерлерін кәсіби мерекесімен құттықтап, адамдардың жайлы әрі қауіпсіз өмір сүруіне зор үлес қосып жүрген мамандардың еңбегін ерекше атап өтті, деп хабарлайды F16.kz.
Бүгін елімізде тұрғын үй-коммуналдық шаруашылығы саласының қызметкерлері кәсіби мерекелерін атап өтіп жатыр. Олар күнделікті қажырлы еңбегімен халықтың жайлы әрі қауіпсіз өмір сүруіне өлшеусіз үлес қосып келеді. Тәулік бойы атқаратын қызметтерінің арқасында үйлер мен маңызды нысандар жылумен, жарықпен және сумен қамтамасыз етіліп, көшелер таза әрі көрікті қалпын сақтап отыр.
Шығыс Қазақстанда 4741,32 шақырым сумен жабдықтау желісі, 1181,58 шақырым кәріз желісі, 1018 шақырым жылумен жабдықтау желісі, 34 орталықтандырылған қазандық және үш жылу электр орталығы бар. Жалпы ТҮКШ саласында 2 жарым мыңнан астам адам еңбек етеді. Төтенше жағдайлар кезінде де олар әрдайым алдыңғы шептен табылып, тұрғындардың қауіпсіздігі мен тыныштығы үшін аянбай тер төгіп келеді.
Мерекелеріңіз құтты болсын! Сіздерге зор денсаулық, ұзақ ғұмыр, шаңырақтарыңызға шаттық пен бақыт тілеймін! Абыройларыңыз артып, жаңа жетістіктерге жете беріңіздер! – деп жазды аймақ басшысы әлеуметтік желідегі парақшасында.
