Шығыс Қазақстан облысында жол инфрақұрылымын жақсарту бағытындағы жұмыс жүйелі түрде жүргізіліп келеді. Бүгінде жолшылар Күршім-Бурабай-Маралды трассасының 28-33 шақырымындағы Сайлыбай учаскесін жөндеп жатыр, деп хабарлайды F16.kz.
Фото: F16.kz/Сайлыбай учаскесі. 2024 ж.
Мердігер ұйым «ОблШығысЖол» ЖШС-ның мәліметінше, аталған жол бөлігін нормативтік жағдайға келтіру мақсатында 15 маман мен арнайы техника жұмылдырылған. Атап айтқанда, екі экскаватор, бір тиегіш, жеті самосвал және ГАЗ-66 автокөлігі жұмысқа тартылған.
Қазір жұмысшылар жолдың беткі қабатын тегістеп, қалпына келтіруге кірісті. Негізгі жұмыс аяқталғаннан кейін жол сапасын арттыруға бағытталған қосымша шаралар атқарылады. Аталған учаскедегі жұмыс жауапты басқарманың бақылауында.
Айта кетсек, Сайлыбай учаскесінің жері саздауыт, ойнамалы болып келеді. Сондықтан автокөлік жолының дәл осы бөлігі, әсіресе ылғал көбейген көктем мен күз айларында жиі бүлініп, ми батпаққа айналады.
