ҚР Президентінің кеңесшісі Бақытжан Сапиевтің төрағалығымен өткен жиында абаттандыру және көгалдандыру жұмыстарының жай-күйі талқыланды, деп хабарлайды F16.kz.
Жиын барысында Шығыс Қазақстан облысының әкімі Нұрымбет Сақтағанов баяндама жасап, Мемлекет басшысының экопарктер құру жөніндегі тапсырмасының орындалу барысы туралы баяндады.
Өскемен қаласында 21,4 гектар аумақта «Шоқ қайың» экопаркін құру жоспарланып отыр. Ұлан ауданында 25 гектар аумақта «Жасыл аймақ» экопаркін құру қарастырылған. Сондай-ақ Глубокое ауданы аумағында 40 гектар жерде «Таулы Үлбі» экопаркі жобалануда. Осы үш жобаны іске асырудың жалпы құны 450 млн теңгені құрайды. Жобалар жергілікті бюджет қаражаты есебінен жүзеге асырылады, — деді ШҚО әкімі.
Аталған жобаларды іске асыру экологиялық жағдайды жақсартуға, рекреациялық инфрақұрылымды дамытуға және халықтың демалуына қолайлы жағдай жасауға бағытталған. Облыстың басқа да қала, аудандарында осындай экопарктер құру көзделген.
Экопарктерді құру тұрғындардың экологиялық мәдениет деңгейін арттыруға, көгалдандырылған аумақтардың үлесін ұлғайтуға және сапалы қоғамдық кеңістіктердің қолжетімділігін қамтамасыз етуге мүмкіндік береді деп күтілуде. Жобалардың іске асу барысы тұрақты бақылауда, — деді Нұрымбет Сақтағанов.
