Шығыс Қазақстан облысында «Заң және тәртіп» нарративін іске асыру аясында ауқымды ақпараттық акция өтті. Шараны облыстың экономикалық тергеп-тексеру департаменті прокуратура және әкімдікпен бірлесіп ұйымдастырды, деп хабарлайды F16.kz.
«Стоп пирамида! Қаржылық сауаттылықты арттыру» тақырыбындағы іс-шараға жалпы білім беретін мектеп мұғалімдері мен колледж оқытушылары қатысты. Негізгі мақсат – педагогтердің қаржылық сауаттылық деңгейін көтеру, алаяқтық схемаларды, оның ішінде қаржы пирамидасын тану дағдыларын қалыптастыру.
Кездесу барысында мамандар қаржы пирамидасының негізгі белгілері мен олардан сақтану жолдары туралы түсіндіріп, қаржылық қауіпсіздік тақырыбында арнайы дәріс оқыды. Сондай-ақ қатысушыларға Қаржылық мониторинг агенттігінің AI-офицері – AI_DOS арқылы дайындалған материалдар көрсетілді.
Іс-шара барысында педагогтер өзекті мәселелерді талқылауға атсалысты. Пікір алмасу барысында қаржылық қауіпсіздікке қатысты маңызды тақырыптар көтеріліп, мазмұнды әрі нәтижелі диалог өрбіді.
