Шығыс Қазақстан облысында көпқабатты тұрғын үйлерді басқарудың жаңа үлгісі кезең-кезеңімен енгізіліп жатыр. Қазірдің өзінде өңірдегі мыңнан астам үй жаңартылған жүйе бойынша жұмыс істеуге көшті, деп хабарлайды F16.kz.
Облыстық энергетика және тұрғын үй-коммуналдық шаруашылық басқармасы басшысының орынбасары Рауан Тұрысбектің мәліметінше, бүгінде 1184 көпқабатты тұрғын үй басқарудың жаңа нысандарына өткен. Бұл жалпы тұрғын үй қорының 35 пайызына тең. Оның ішінде 415 үй мүлік иелері бірлестігі (МИБ) арқылы басқарылса, 769 үй тікелей бірлескен басқару (ТББ) форматын таңдаған.
Жаңа жүйе аясында «бір үй – бір шот» қағидаты енгізілген. Бұл тұрғындар қаражатының ашық әрі мақсатты жұмсалуына мүмкіндік береді.
Мамандардың айтуынша, аталған өзгерістер ең алдымен басқару үдерісінің ашықтығын арттырып, тұрғын үйлерді күтіп ұстау сапасын жақсартуға бағытталған. Сонымен қатар сервистік қызмет көрсету нарығын дамытуға да серпін бермек.
