Өскеменде бірнеше жыл бойы халықаралық іздеуде болған күдікті қолға түсті. Ер адам автокөлік сатамын деген сылтаумен азаматтарды алдағаны үшін іздеуде жүрген, деп хабарлайды F16.kz.
Шығыс Қазақстан облысы полиция департаментінің мәліметінше, 48 жастағы күдіктіні криминалдық полиция қызметкерлері ұстаған. Ол 2022 жылдан бері алаяқтық әрекеті үшін халықаралық іздеуде болған.
Тергеу деректеріне сәйкес, күдікті көлік сату бойынша жалған ұсыныстар жасап, сатып алушыларға тиімді шарттар ұсынған. Осы арқылы азаматтардан алдын ала төлем алып, кейін уәдесін орындамаған. Кей жағдайларда сенімге кіру үшін жәбірленушілерге ақшаның бір бөлігін қайтарып, мәміленің заңды екеніне көз жеткізген.
Алдын ала есеп бойынша, оның әрекетінен келген жалпы шығын көлемі 30 миллион теңгеден асады.
Сондай-ақ келісімшарт рәсімдеу кезінде күдікті үшінші тұлғаларды пайдаланып, олардың атына қарыз шарттарын тіркеген. Ақша беру процесі көп жағдайда нотариустардың қатысуымен жүзеге асқан. Белгілі болғандай, ол бұған дейін де алаяқтық фактілері бойынша қылмыстық жауапқа тартылған.
Қазір күдікті уақытша ұстау изоляторына қамалды. Аталған дерек бойынша Қазақстан Республикасы Қылмыстық кодексінің «Алаяқтық» бабы аясында сотқа дейінгі тергеу амалдары жүргізіліп жатыр.
