Самар ауданында үйінің аумағын қоқыстан тазартпаған тұрғындар айыппұл арқалады. Жергілікті полиция осыған дейін аталған тұлғаларға ескерту жасаған болатын.
Аудан әкімдігі мен тәртіп сақшылары көктем шығысымен «Таза Қазақстан» экологиялық акциясын қолдау мақсатында тәртіпті күшейткен.
Самар ауданында «Таза Қазақстан» акциясы аясында жүргізілген рейд кезінде үш заңсыз қоқыс алаңы анықталып, тиісті материалдар экология департаментіне жолданды. Сонымен қатар ортақ пайдаланылатын қоғамдық орындарда 30-ға жуық әкімшілік құқық бұзу дерегі тіркелді. Оның ішінде 13 құқық бұзушы сот шешімімен қоғамдық жұмысқа тартылды. Қоғамдық жұмысты орындамаған бір азаматқа қатысты әкімшілік шара қабылданды. Экология талаптарын бұзғаны үшін 80-ге жуық азаматқа ескерту жасалып, айыппұл салынды. Сондай-ақ анықталған құқық бұзу жағдайларын жою мақсатында бес адамға тиісті ұсынымдар берілді, – деді Самар аудандық полиция бөлімінің баспасөз қызметі.
Айта кетейік, жуықта Шығыс Қазақстан облысының әкімі барлық аудан басшыларына тазалықты сақтау бойынша нақты тапсырма берген.
Самар ауданында аумақты қоқыстан тазарту жұмысы әлі де жалғасып жатыр. Шараға әкімдікке қарасты мекемелер, белсенді жастар және аудан тұрғындары үнемі қатысады.
