Шығыс Қазақстан облысында ерекше қажеттіліктері бар азаматтарға қолайлы орта қалыптастыру бағытындағы жұмыс жалғасып жатыр. Биыл өңірде 270 әлеуметтік нысанды бейімдеу жоспарланған, деп хабарлайды F16.kz.
Премьер-министр Олжас Бектеновтің төрағалығымен өткен Үкімет отырысында мемлекеттің инклюзивті саясатын жетілдіру жолдары талқыланды. Жиынға ШҚО әкімі Нұрымбет Сақтағанов та қатысты.
Қазір Шығыс Қазақстанда 29 мыңнан астам ерекше қажеттіліктері бар адам тұрады. Оның ішінде 3,3 мыңы – балалар.
Облыстық жұмыспен қамту және әлеуметтік бағдарламаларды үйлестіру басқармасының мәліметінше, өңірде көру қабілеті бойынша – 4 142 адам, есту қабілеті бойынша – 1 085 адам, ал қозғалу қиындықтарына байланысты 7 126 адам ерекше қолдауды қажет етеді. Оларды қоғамға бейімдеу мақсатында жыл сайын техникалық оңалту құралдары мен әлеуметтік қызмет көрсету бойынша 14-15 мыңнан астам өтініш орындалады.
Жыл басынан бері 7 мыңға жуық өтініш түсіп, оның 4236-сы қанағаттандырылған. Осылайша, оңалту бағдарламаларының орындалу деңгейі 60,9%-ға жетті.
Айта кету керек, 2023-2027 жылдарға арналған жоспарға сәйкес, өңірде 1 348 әлеуметтік нысанды бейімдеу көзделген. Соның ішінде биыл 270 нысан қамтылмақ. Қазір оның 42-сі дайын.
Өңірде «Инватакси» қызметі де іске қосылған. Бүгінде бұл қызметпен 520 адам қамтылып, 36 көлік жұмыс істеп тұр.
Сондай-ақ облыста ерекше қажеттіліктері бар азаматтардың 12,5 мыңнан астамы еңбекке қабілетті. Олардың шамамен 3 800-і тұрақты табыс тауып отыр. Биыл 113 адам жұмысқа орналасса, 26 адам «Бастау Бизнес» жобасы аясында оқуға жіберілген.
