Шығыс Қазақстан облысында орман қорының жалпы аумағы 3 миллион гектардан асады, оның 1,7 миллион гектары жасыл желекті алқап. Қазір өңірде орман өртінің алдын алу және тілсіз жаумен күрес бағытында жүйелі жұмыс жалғасып жатыр. Бұл туралы ШҚО табиғи ресурстар және табиғат пайдалануды реттеу басқармасы басшысының міндетін атқарушы Мерхат Амиров облыс әкімдігінің мәжілісінде айтты, деп хабарлайды F16.kz.
Былтыр өңірде 27 орман өрті болып, жалпы аумағы 204 гектар алқап отқа оранған. Биыл тиісті орындар төтенше жағдайларды азайту үшін қауіпсіздік шараларына ерте бастан кірісті. Өңірде өрт қаупі жоғары маусым 13 сәуірде басталды. Орманды өрттен қорғауға, қауіптің алдын алуға және тілсіз жаумен күреске жиыны 1549 адам, 437 техника, төрт тікұшақ және 4 мыңнан астам арнайы құрал-жабдық дайындалған. Сонымен қатар өрт ошақтарын жедел анықтау және бақылау мақсатында 36 ұшқышсыз ұшу аппараты қолданылады.
Өрт қауіпті кезеңге дайындық аясында жанар-жағармай қоры да алдын ала жасақталған. Атап айтқанда 40 тонна дизель отыны мен 55 тонна бензин қоры дайын тұр.
Орман шаруашылықтарының материалдық-техникалық базасын нығайту бағытында кейінгі жылдары ауқымды жұмыс жүргізілді. Соңғы 7 жылда облыс бюджетінен 2 млрд 650 млн теңге бөлініп, 23 трактор, төрт вахта автокөлігі, 14 өрт сөндіру автокөлігі, 40 шағын өрт сөндіру кешені және 16 патруль автокөлігі сатып алынды.
Былтыр «Өнеркәсіпті дамыту қоры» АҚ арқылы лизинг негізінде 3,9 млрд теңгеге 122 техника алынған. Оның ішінде 34 шағын өрт сөндіру кешені, 47 трактор және 41 өрт сөндіретін автоцистерна бар, — деп атап өтті басқармасы басшысының міндетін атқарушы.
Облыстың тоғыз орман шаруашылығында өртті ерте анықтау жүйесін енгізу бойынша жол картасы әзірленген. Соған сәйкес 90 арнайы орын белгіленіп, жүйені енгізудің жалпы құны есептелді.
2026 жылға арналған өрт қаупі жоғары кезеңге дайындық аясында бірқатар профилактикалық іс-шара жоспарланып отыр. Атап айтқанда, жалпы ұзындығы 62 шақырым минералдандырылған жолақтар жасау, 540 шақырым болатын қолданыстағы жолақтарға күтім жүргізу, 239 аншлаг орнату және халық арасында түсіндіру жұмыстарын күшейту керек, — деді Мерхат Амиров.
