Ресей астанасы Мәскеуде мектеп оқушылары арасында химия пәнінен Халықаралық Менделеев олимпиадасы өтті. Аталған беделді білім сайысында Қазақстан намысын қорғаған оқушылар қатарында Өскемендегі Назарбаев зияткерлік мектебінің оқушысы Айзере Жеңісханова жоғары нәтиже көрсетіп, күміс медаль иегері атанды, деп хабарлайды F16.kz.
Менделеев олимпиадасы – мектеп оқушылары арасындағы химия пәні бойынша әлемдегі ең беделді жарыстардың бірі. Оның халықаралық мәртебесі ЮНЕСКО тарапынан ресми түрде мойындалған. Биылғы додаға әлемнің 37 елінен шамамен 200 оқушы қатысып, білімдерін сынға салды. Қатысушылар қатарында Қазақстанмен қатар Сауд Арабиясы, Шри-Ланка, Солтүстік Македония, Израиль, Түркия, Әзербайжан, Иордания, Коста-Рика, Таиланд, Египет, Өзбекстан, Куба, Чад, Моңғолия, Түрікменстан, Бразилия, Армения, Тәжікстан, Камерун, Бангладеш, Вьетнам, Ботсвана, Нигерия, Беларусь және Қытай елдерінің өкілдері болды.
Қазақстан ұлттық құрамасы сапында сынға түскен Айзере Жеңісханова күрделі тапсырмаларды сәтті орындап, жоғары білім деңгейін дәлелдеп, күміс жүлдені жеңіп алды. Бұл жетістік оның жүйелі еңбегі мен терең дайындығының нәтижесі ретінде бағаланып отыр.
Жас олимпиадашының табысына оның ұстазы, химия пәнінің мұғалімі Жанар Семейханқызының қосқан үлесі ерекше. Мамандардың айтуынша, мұндай халықаралық деңгейдегі жетістіктер оқушының жеке талантымен қатар сапалы білім беру мен кәсіби тәлімгерліктің нәтижесі болып есептеледі.
Айзеренің бұл жеңісі Шығыс Қазақстанның білім саласындағы әлеуетін тағы бір мәрте көрсетіп, жас буынның ғылымға деген қызығушылығын арттыруға серпін бермек.
