Шығыс Қазақстан облысының прокуратурасы «Clean Streets» мобильді қосымшасын іске қосты, деп хабарлайды F16.kz.
Қосымша арқылы есірткі граффитилері (үй қабырғаларындағы есірткі сайттарының жарнамасы), жасырынған есірткілер мен ықтимал өткізу орындары және күдікті әрекеттер туралы хабарлауға болады.
Қосымша ШҚО цифрландыру басқармасымен және Oskemen Hub-пен бірлесіп ұйымдастырған Codemasters Hackathon 4.0 IT-марафоны аясында әзірленді. Бұл бастама бұған дейін енгізілген, есірткі туралы расталған ақпарат үшін ақшалай сыйақы беруді қарастыратын «STOP есірткі!» жобасының IT-жалғасы болып есептеледі, — деп мәлімдеді облыстық прокуратураның баспасөз қызметі.
Пайдаланушылар қосымшада нақты геолокацияны көрсетіп және фотоайғақтарды тіркей отырып, мәліметтерді жібере алады.
Әрбір расталған хабарламаға ақшалай сыйақы қарастырылған.
