Шығыс Қазақстан облысында синтетикалық есірткі өндірумен айналысқан жасырын зертхананың қызметі тоқтатылды. Арнайы операция барысында 26 және 22 жастағы екі күдікті ұсталды, деп хабарлайды F16.kz.
Тергеу деректеріне сәйкес, күдіктілер шалғай ауылдардың бірінен үй жалдап, сол жерде синтетикалық есірткі өндіруді жолға қойған. Жедел-іздестіру іс-шаралары мен тінту барысында ірі көлемдегі заңсыз өнім анықталды. Тергеу барысында қылмыстық әрекет интернеттің көлеңкелі сегменті арқылы қашықтан жүргізілгені анықталды.
Құқық қорғау органдары зертханадан 70 келі дайын синтетикалық «Альфа-PVP» есірткісін, сондай-ақ 4 тонна химиялық реагенттер мен прекурсорлар тәркіледі. Сонымен қатар есірткі өндіруге арналған арнайы зертханалық жабдықтар да алынған.
Аталған факті бойынша Қазақстан Республикасы Қылмыстық кодексінің 297-1-бабы бойынша сотқа дейінгі тергеп-тексеру басталды. Есірткі өндірісін ұйымдастырушыларға өмір бойына бас бостандығынан айыру жазасы қарастырылған.
