Қазақстан Республикасының Бас прокуроры Берік Асылов Америка сауда палатасының (AmCham) Қазақстандағы директоры Джефф Эрлихті, сондай-ақ Consolidated Contractors Company халықаралық компаниясының және шетелдік қатысуы бар «Комек Машинери Казахстан» ЖШС өкілдерін қабылдады.
Кездесу барысында инвесторлардың құқықтарын қорғау және ынтымақтастықты дамытуға қатысты өзекті мәселелер талқыланды. Инвесторлар Бас прокуратураның Инвесторлардың құқықтарын қорғау комитеті қабылдап жатқан шаралардың практикалық тиімділігін атап өтіп, көрсетілген қолдау үшін алғыс білдірді.
Атап айтқанда, мемлекеттік сараптама кезеңінде Су ресурстарын пайдалану және қорғауды реттеу жөніндегі бассейндік инспекция тарапынан рұқсат бермеу мәселесі шешімін тапты. Мемлекеттік органдар арасындағы үйлестірудің жеткіліксіздігі мен түсінбеушіліктер салдарынан туындаған түйткіл су қорғау жолағын түзету жобасы келісу арқылы реттелді. Нәтижесінде жұмыс жобасы бойынша мемлекеттік сараптаманың оң қорытындысы алынды.
Сонымен қатар құрылыс басталғаны туралы хабарлама алу кезінде туындаған әкімшілік кедергілер де еңсерілді. Құрылыс және сәулет саласындағы бақылау органдары тарапынан нормативтік талаптарды әртүрлі түсіндіру салдарынан пайда болған мәселелер Бас прокуратураның қолдауымен шешіліп, компания құрылыс жұмысын бастауға ресми рұқсат алды.
Компания Қазақстан заңнамасын сақтау, ашықтық пен адалдық қағидаттарын ұстанатынын растады. Сондай-ақ инвестициялық жобаларды іске асыру мәселелері бойынша мемлекеттік органдармен тиімді әрі ашық ынтымақтастыққа дайын екенін білдірді.
Кездесу қорытындысы бойынша компания негізгі қызмет бағыттарын ілгерілету үшін Бас прокуратураның қолдауына ие болды.
