Ахмер ауылының жолы алдағы үш жылда толық аяқталып, екі жылда көшелері 100 пайыз жарықтандырылуы керек. Бұл туралы тұрғындармен кездесу барысында аймақ басшысы Нұрымбет Сақтағанов айтты, деп хабарлайды F16.kz.
ШҚО әкімі Нұрымбет Сақтағанов пен шаһар басшысы Алмат Ақышов Ахмер ауылы тұрғындарымен кездесіп, жергілікті жұртты мазалаған өзекті мәселелерді талқылады.
Облыс орталығында жол жөндеу жұмысының бірінші кезеңі басталды. Қала бойынша 42 учаскеде жалпы ұзындығы 52 шақырым жол жөнделмек. Оның ішінде Ахмер ауылында алты көшеге асфальт төселеді.
Жалпы ұзындығы 5 шақырым болатын алты көшені жөндеу жоспарланып отыр. Атап айтқанда, Қалдаяқов, Қайыңды, Нұқаев, Еңбекші, Қондыбаев көшелері және №49 мектептен тасжолға шығатын учаске жөнделеді. Жобаның құны — 300 миллион теңге. Айта кету керек, бұрын-соңды Ахмер ауылында мұндай жұмыс жүргізілмеген. Былтыр тек бір көшенің жолы жөнделді. Биыл жол мәселесін басты назарға алып отырмыз. Ауылда шешімін таппай келе жатқан басқа да өзекті мәселелер бар. Бәрін бір мезетте шеше алмасақ та, кезең-кезеңімен қолға аламыз, — деді қала әкімі Алмат Ақышов.
Ахмер ауылында жалпы ұзындығы 40 шақырым болатын 30-дан астам көше бар. Халық саны да жылдан-жылға артып келеді. Жергілікті тұрғындардың дені орталықтандырылған жылумен қамтылған. Алайда, көше жарығы тартылмаған бірқатар көшенің тұрғындары балалардың қауіпсіздігіне алаңдайды.
Жарық мәселесін түбегейлі қарап жатырмыз. 10-15 жыл бұрын жіберілген қателіктер бар. Дегенмен түзелмейтін қателік жоқ. Барлығын ретке келтіреміз. Биыл және келер жылы көше жарығы мәселесі шешімін табады. Ал жолға асфальт төсеу жұмысы алдағы үш жыл ішінде толық аяқталады, – деді Нұрымбет Сақтағанов.
Өңір басшысы қала әкімдігіне қажетті құжаттарды алдын ала дайындап, бұл жұмыстарды 2026–2028 жылдар аралығында рет-ретімен аяқтауды тапсырды. Сондай-ақ жаңадан салынып жатқан үйлерді су және жарықпен толық қамтамасыз ету мәселесіне де ерекше назар аударылды.
Одан бөлек кездесу барысында тұрғындар су ағатын арықтарды реттеу, жол қауіпсіздігі, ойын алаңын орнату мәселесін көтерді.
Омаров пен Мұхамеджанова көшелері қиылысады, сол жерде 4-5 көшенің тұрғындары бірігіп ойын алаңын орнаттық. Десе де халықтың қалтасынан ондай көп қаражат шықпайтыны белгілі. Сондықтан футбол алаңын салса деген өтінішіміз бар, — деді Ахмер тұрғыны Мақсат Садықбаев.
Қала әкімі өз сөзінде жер құжаттарын қарап, мемлекеттің меншігінде болса, тұрғындар өтініші ұзаққа созылмай орындалатынын жеткізді.
