Биылғы 27–29 сәуір аралығында Алтай станциясы көліктегі полиция бөлімшесінің қызмет көрсету аумағында «Құқықтық тәртіп» атты жедел-профилактикалық іс-шара өтіп жатыр. Шараның негізгі мақсаты – қоғамдық қауіпсіздікті қамтамасыз ету, құқық бұзу жағдайларының алдын алу және азаматтардың құқықтық сауаттылығын арттыру, деп хабарлайды F16.kz.
Іс-шара аясында полиция қызметкерлері теміржол вокзалы аумағында, сондай-ақ жолаушылар көп шоғырланатын орындарда түсіндіру, алдын алу жұмысын жүргізді. Тәртіп сақшылары тұрғындарға қоғамдық орындардағы мінез-құлық мәдениетін сақтау қажеттігін ескертіп, әкімшілік құқық бұзғандарға қандай жаза берілетіні туралы айтты. Сонымен қатар, азаматтарға заңға қатысты кеңес берілді.
Кәмелетке толмағандар арасындағы құқық бұзу оқиғаларының алдын алу мәселесі де назардан тыс қалған жоқ. Осы бағытта жасөспірімдермен және олардың ата-аналарымен түсіндіру жұмысы жүргізіліп, балаларды қараусыз қалдырмау жөнінде ескерту жасалды.
Алтай станциясы көліктегі полиция бөлімшесі тұрғындарды заң талаптарын қатаң сақтауға және қоғамдық тәртіпті бұзбауға шақырады.
