Өскеменде мектеп бітіруші түлектер туған қаланы көркейтуге бағытталған экологиялық акцияға белсенді қатысып, көгалдандыруға өз үлесін қосты. Іс-шара «Таза Қазақстан» республикалық акциясы мен «Адал азамат» бірыңғай тәрбие бағдарламасы аясында ұйымдастырылды, деп хабарлайды F16.kz.
Облыс орталығының мектептерінде өткен көшет отырғызу челленджіне №24 және №50 білім ордаларының педагогтері, оқушылар мен түлектер қатысты. Акция барысында мектептердің аумағына көшеттер егілді. Игі бастаманы ұйымдастырушылардың айтуынша, бұл жас шыбықтар алдағы уақытта мектеп ауласының ажарын ашып қана қоймай, өскелең ұрпақтың табиғатқа деген жанашыр көзқарасының символына айналмақ.
Мамандар мұндай бастамалардың тек абаттандырумен шектелмейтінін айтады. Экологиялық акция жастардың табиғатқа ұқыпты қарау мәдениетін қалыптастырып, қоршаған ортаның жай-күйіне жауапкершілікпен қарауға тәрбиелейді. Ағаш егуге тікелей қатысу арқылы жастар табиғатты қорғаудың маңызын тереңірек түсінеді.
Кейінгі жылдары елімізде мұндай игі шаралар дәстүрге айналды. Бұл мектеп қауымдастығын – оқушылар, мұғалімдер және ата-аналарды ортақ мақсатқа біріктіреді. Ол мақсат – туған қаланы таза, жасыл әрі жайлы ету.
Түлектер үшін бұл акция ерекше мәнге ие болды. Олар білім алған қарашаңырақта ағаш отырғызып, туған жерге деген құрметін іс жүзінде көрсетті.
Жалпы, «Таза Қазақстан» бағдарламасы аясында еліміздің түрлі өңірлерінде ұйымдастырылып жатқан экологиялық шаралар жастар тарапынан кең қолдау тауып жатқаны қуантады. Соның арқасында қоршаған ортаның қадірін түсінетін, табиғатты аялауды басты құндылықтардың бірі ретінде қабылдайтын жауапты ұрпақ өсіп келеді.
