Шығыс Қазақстан облысында қоғамдық қауіпсіздікті нығайту мақсатында заманауи технологиялар қарқынды қолданылып жатыр. Қазір өңірде 6 мыңға жуық бейнебақылау камерасы жұмыс істеп тұр, оның ішінде интеллектуалды бейнеталдау жүйесімен жабдықталған құрылғылар да бар, деп хабарлайды F16.kz.
Облыстық цифрландыру және архивтер басқармасының басшысы Қайрат Бимағамбетов бейнебақылау жүйесіне жасанды интеллект құралдарын енгізу нақты уақыт режимінде жұмыс істеуге мүмкіндік беретінін атап өтті.
Бүгінде облыс аумағында 5900-ден астам бейнебақылау камерасы жұмыс істейді, оның ішінде 300 камера бейнеталдау жүйесімен жабдықталған. Жасанды интеллект негізіндегі жүйелер адамның бет-бейнесін, көлік құралдарын танып, қалыптан тыс жағдайларды тікелей эфир режимінде анықтай алады, – деді ол.
Басқарма басшысының айтуынша, жүйенің басты ерекшелігі – оның адам факторынсыз-ақ күрделі тапсырмаларды орындай алуында. Жасанды интеллект негізіндегі камералар тек кескінді түсіріп қана қоймай, оны нақты уақыт режимінде талдай алады. Олардың негізгі мүмкіндіктеріне мыналар жатады:
- Бет-бейнені тану: Жедел іздеудегі тұлғаларды немесе хабар-ошарсыз кеткен адамдарды көпшілік ішінен бірден анықтау.
- Көлік мониторингі: Мемлекеттік нөмірлерді тану, көлік маркасы мен түсін ажырату, сондай-ақ іздеудегі автокөліктерді белгілеу.
- Қалыптан тыс жағдайлар: Көшедегі төбелесті, рұқсат етілмеген жерде қалдырылған затты немесе адамдардың жаппай шоғырлануын жедел анықтап, ПД Жедел басқару орталығына (ЖБО) дабыл белгісін береді.
Облыстық цифрландыру және архивтер басқармасының мәліметінше, бейнебақылау желісін кеңейту жұмысы алдағы уақытта да жалғасады. Қалада ғана емес, ауылдарда да бейнебақылау жүйесі біртіндеп іске қосылмақ. Бұл қауіпсіздікті жүзеге асыруға және кез келген оқиғаға жедел әрекет ету уақытын қысқартуға мүмкіндік береді.
Бүгінгі таңда Өскемендегі барлық камералар бір арнаға тоғыстырылып, бірыңғай цифрлық экожүйе ретінде жұмыс істеп тұр. Бұл – қаланың техникалық жабдықталу деңгейінің жоғары екендігінің айқын дәлелі.
