Өскемен іргесіндегі Шешек асуында бұрын—соңды болмаған ерекше форматта іс—шара өтті. Ит жетектеген қала тұрғындары табиғат аясында серуенге шықты, деп хабарлайды F16.kz.
Алдын ала тіркелген 120-дан астам қатысушының қарасы серуен басталған сәтте тіпті көбейіп, жалпы саны шамамен 150 адамға жетті. Олардың басым бөлігі отбасыларымен келді. Тұрғындар мұндай бастаманың, әсіресе балалар үшін маңызды екенін атап өтті. Себебі, кішкентайынан үй жануарларына жақын болған жас ұрпақ мейірім мен қамқорлықты, жауапкершілікті сезініп өседі.
Төрт сағатқа созылған серуен барысында қатысушылар табиғат аясында уақыт өткізіп, қоғамның жануарларға деген жанашырлық сезімін күшейтуге тырысты.
Аталған шара Мемлекет басшысы Қасым-Жомарт Тоқаев бастамашы болған «Таза Қазақстан» бағдарламасымен үндесетінін айта кету керек. Игі бастама аясында экологиялық мәдениетпен қатар жануарларға гуманистік көзқарас қалыптастыру мәселесі де көтерілген.
Қазір қоғамда жануарларды эвтаназиялау мәселесіне қатысты пікірталас күшейген тұста осындай іс-шара өткізудің маңызы зор. Біз бұл бастама арқылы қоғамда жауапкершілік пен жанашырлық мәдениетін нығайтуға болатынын көрсетуге тырыстық, – деді ұйымдастырушылар.
Айта кетейік, итпен серуен Шығыс Қазақстанда жыл сайын өткізіліп келеді. Алайда биылғы шара кең ауқымды қолға алынып, алғаш рет рекорд орнату идеясы ұсынылды.
Қазір Қазақстанның рекордтар кітабына тіркелу үшін өтінім дайындалып жатыр, жуық арада редакциялық комиссияға жолданбақ.
Сонымен қатар қатысушылар санын растайтын фото және бейнематериалдар да қоса ұсынылады.
