Өскеменде Шығыс Қазақстан облысының Кәсіпкерлер палатасы жанындағы креативті индустрияны дамыту жөніндегі кеңестің отырысы өтті. Жиын түрлі бағыттағы шығармашылық және бизнес өкілдерін бір алаңға жинап, саланы жүйелі дамыту мәселелерін талқылауға арналды, деп хабарлайды F16.kz.
Кездесудің негізгі тақырыбы — креативті индустрияны дамытудың тиімді тетіктерін қалыптастыру. Қатысушылар өңірде бұл бағытта белсенді жұмыс жүргізіліп жатқанын атап өткенімен, сала ішіндегі үйлесімнің жеткіліксіздігі өзекті мәселе болып отырғанын жеткізді.
Атап айтқанда, креативті қауымдастықтың бытыраңқы болуы негізгі кедергілердің бірі ретінде айтылды. Түрлі шығармашылық топтар мен жеке креаторлар көбіне ортақ ақпараттық кеңістіктен тыс қалып, нәтижесінде маңызды іс-шаралар, байқаулар мен оқыту бағдарламалары өз аудиториясына толық жетпей отыр.
Жиынға қатысушылардың пікірінше, ақпарат тарату көбіне тар кәсіби ортадағы чаттармен шектеледі. Соның салдарынан көптеген маман мүмкіндіктер туралы дер кезінде хабардар болмайды. Бұған қоса, іс-шаралардың бір күнге сәйкес келуі де қиындық туғызады — әртүрлі деңгейдегі жобалар бір уақытта ұйымдастырылып, креаторларды таңдау жасауға мәжбүрлейді.
Кеңес барысында стратегиялық жоспарлау мәселесіне де ерекше назар аударылды. Бизнес өкілдері креативті индустрияның тұрақты дамуы үшін ұзақ мерзімді, нақты жоспардың қажеттігін атап өтті. Олардың пікірінше, кемінде бір жыл бұрын әзірленген бірыңғай іс-шаралар күнтізбесі сала өкілдерінің жұмысын тиімді ұйымдастыруға мүмкіндік береді.
Мұндай тәсіл креаторларға өз жобаларын алдын ала жоспарлап, өнімдерін нақты іс-шараларға бейімдеуге жол ашады. Мәселен, қолөнершілер мен дизайнерлер ірі фестивальдерге, туристік маусымдарға немесе мемлекеттік мерекелерге арналған арнайы топтамаларды ертерек дайындай алады. Бұл өз кезегінде өнім сапасын арттырып, жергілікті брендтердің бәсекеге қабілеттілігін күшейтеді.
Отырыстың нақты нәтижелерінің бірі — ШҚО облыстық филармониясы мен келісімге келу болды. Енді креативті қауымдастық өкілдеріне шеберлік сабақтарын өткізу үшін ғимараттарды өтеусіз негізде пайдалану мүмкіндігі қарастырылмақ.
Жиын қорытындысы бойынша қатысушылар сала ішіндегі үйлестіруді күшейту, бірыңғай ақпараттық алаң құру және ұзақ мерзімді іс-шаралар күнтізбесін қалыптастыру бойынша нақты ұсыныстар әзірлеу қажеттігін атап өтті.
