Бүгінде жастар арасында есірткімен күресте құрғақ дәрістерден гөрі, жанды өнердің әсері күштірек. Осы орайда Өскемендегі дарынды балаларға арналған облыстық мамандандырылған мектеп-лицей-интернатының оқушылары «Таңдау» спектаклін тамашалады, деп хабарлайды F16.kz.
Шығыс Қазақстан облыстық полиция департаментінің есірткі қылмысына қарсы іс-қимыл басқармасы мен «SAMGA» даму орталығы ұйымдастырған бұл жоба жастарды қауіпті қадамдардан сақтандыруды көздейді. Жантай Тұрысбековтің қаламынан туған туынды бүгінгі күннің ащы шындығын — «есірткі жасырушылар» (закладчиктер) мен оңай олжаның артында тұрған қасіретті баяндайды.
Қойылымның басты ерекшелігі — оның форматында. Сахнадағы жас актерлердің шынайы ойыны залдағы жеткіншектерге қатты әсер етті. Мұнда әдеттегі «болмайды» деген тыйымдардың орнына, кейіпкерлердің тағдыры арқылы қате таңдаудың зардабы көрсетілді.
Шығармашылық арқылы алдын алу форматы өзінің тиімділігін тағы да дәлелдеді. Құрғақ деректер емес, жанды эмоциялар оқушыларды терең ойға қалдырды. Спектакль аяқталғаннан кейін оқушылар бірден тарқап кетпей, көргенін ұзақ талқылады. Олардың айтуынша, қойылым бір ғана қате қадам адамның бүкіл болашағына балта шабуы мүмкін екенін анық ұғындырған.
Бұл шара — жастарды құқық бұзушылықтан қорғап қана қоймай, олардың саналы түрде дұрыс таңдау жасауына бағытталған маңызды қадам болды.
