Сәрсен Аманжолов атындағы Шығыс Қазақстан университеті базасында «Pro еңбек құқықтары» атты интерактивті кездесу ұйымдастырылды. Ашық диалог форматында өткен кездесуде қатысушыларға жұмысқа орналасу алдында назар аудару қажет негізгі бес қадам ұсынылды, деп хабарлайды F16.kz.
Іс-шараның басты мақсаты – жастардың құқықтық сауаттылығын арттыру, еңбек қатынастары саласындағы өзекті мәселелерді талқылау және студенттерді өз құқығын қорғау тетіктерімен таныстыру.
Бағдарлама аясында қатысушылар арнайы QR-код арқылы анонимді сауалнамаға қатысып, еңбек шартынсыз жұмыс істеу, жұмыс берушілер тарапынан кездесетін бұзушылықтар, әлеуметтік аударымдар мен құқықтық қорғаныс мәселелері бойынша өз тәжірибелерімен бөлісті. Нәтижесінде студенттердің едәуір бөлігі еңбек қызметінде құқықтық тәуекелдерге тап болатыны анықталды.
Шара барысында университет ректоры, профессор Мұхтар Төлеген қазіргі еңбек нарығындағы өзгерістер жағдайында жастардың құқықтық қорғалу деңгейін арттырудың маңыздылығына тоқталды. Ол университеттің студенттерге құқықтық қолдау көрсету, жұмыс берушілермен тиімді байланыс орнату және болашақ мамандардың кәсіби дамуына жағдай жасау бағытындағы жүйелі жұмыстарын атап өтті.
Жұмысқа тұрғанда еңбек шартының жасалуы, еңбек құқықтарының сақталуы – өте маңызды тақырып. Арнайы жүргізілген сауалмадан көп жағдайда еңбек құқықтары сақталмайтыны, жалақы уақытында берілмейтінін көріп отырмыз. Мұндай жағдайда жастар өз құқықтарын білуі және оны қорғай алуы керек. Прокуратура да бұл мәселеге бей-жай қарамайды. Осыған дейін де жастарға ақпарат беріліп, университет базасында ашық кездесулер өткізілген, — деді университет ректоры.
Шығыс Қазақстан облысы прокуратурасы мен еңбек инспекциясы өкілдері студенттердің еңбек құқықтарының бұзылуына қатысты нақты мысалдар келтіріп, құқық қорғау механизмдері мен әрекет ету алгоритмдерін түсіндірді
Цифрлық еңбек нарығына ерекше назар аударылып, фриланс пен онлайн жұмыс кезіндегі тәуекелдер талқыланды. Спикерлер студенттерге өз құқықтарын қорғау үшін сандық дәлелдердің (скриншоттар, хат алмасу, төлемдер тарихы) маңыздылығын атап өтті.
Кездесудің интерактивті бөлімінде қатысушылар нақты жағдайларды талдап, еңбек құқықтары бұзылған жағдайда әрекет ету жолдарын бірлесіп қарастырды. Сарапшылар ұсынылған шешімдерді толықтырып, тиімді құқықтық алгоритмді ұсынды.
Іс-шара соңында студенттер өз сұрақтарын қойып, мамандардан тікелей жауап алды. Ұйымдастырушылар мұндай кездесулер жастардың құқықтық мәдениетін қалыптастыруда және саналы кәсіби жолды таңдауда маңызды рөл атқаратынын атап өтті.
Кездесу студенттерге еңбек қатынастарының негізгі қағидаларын түсінуге, тәуекелдерді бағалауға және өз құқықтарын тиімді қорғауға қажетті практикалық білім берді.
