Ел Президенті Қасым-Жомарт Тоқаев ШҚО ТЖД №3 өрт сөндіру бөлімінің қызметкері Қанат Қапановты «Ерлігі үшін» медалімен марапаттады, деп хабарлайды F16.kz.
Азаматтық қорғау аға сержанты, өрт сөндіру көлігінің жүргізушісі Қанат Қапанов құтқарушылар қатарында 6 жылдан астам қызмет етіп келеді.
2025 жылы 5 қараша күні ол қызметтен тыс уақытта Қасым Қайсенов кентінде өрт шыққан үйден бірнеше адамды аман алып қалған.
Төртінші қабаттағы пәтерден түтін шығып жатқанын байқаған ол, еш ойланбастан ішке кіріп, 10 жастағы баланы сыртқа алып шыққан. Іште тағы бір баланың қалғанын білген Қапанов қайтадан пәтерге кіреді. Түтін басқан пәтерден екінші рет ол мүмкіндігі шектеулі баланы тауып, аман-есен далаға шығарған.
Ол көршілеріне де қауіп туралы хабар беріп, тұрғындардың бірімен бірге бірінші қабаттағы мүмкіндігі шектеулі адамды эвакуациялайды. Құтқарушының бұл ерлігі — шынайы батырлық пен жоғары кәсіби жауапкершіліктің айқын үлгісі, — дейді ШҚО ТЖД баспасөз қызметі.
