Отан қорғаушылар күні облыс орталығында кең көлемде аталып өтті. Шаһар тұрғындары мен қонақтары алдымен Сағадат Нұрмағамбетов саябағына жиналып, батыр рухына тағзым етті. Артынша «Өскемен» аллеясында ұйымдастырылған мерекелік концертті тамашалады, деп хабарлайды F16.kz.
Өңірдің шығармашылық ұжымдарды, әскери бөлімдер, облыстық полиция департаментінің хоры мен оперетта театрының әртістері және Александр Галсанов жетекшілік ететін Шығыс Қазақстан облысы әкімінің симфониялық оркестрі қатысқан шарада патриоттық әндер шырқалып, көрерменге әсерлі көңіл күй сыйлады.
Сондай-ақ Өскемен гарнизонының 27943 әскери бөлімі аллея бойында әскери киімдер мен қару-жарақтар көрмесін ұйымдастырған.
Отанды қорғау — әр азаматтың қасиетті борышы. Әскери қызметшілеріміздің ерлігі, төзімділігі мен адалдығының арқасында біз бейбіт аспан астында өмір сүріп жатырмыз. Бұл күн – ел тыныштықы мен мемлекет қауіпсіздігін күзеткен айбынды азаматтарға ерекше құрмет көрсететін күн. Әскери қызмет – үлкен жауапкершілік пен табандылықты талап ететін абыройлы міндет. Қандай жағдай болмасын сіздер қоғам қауіпсіздігі мен заң үстемдігін қамтамасыз етіп, ел мүддесіне адал қызмет етіп келесіздер. Бүгінгі бейбін өмір мен тұрақтылықтың артында сіздердің қажырлы еңбектеріңіз, жанкешті еңбектеріңіз тұр. Осы үшін баршаңызға шынайы алғыс білдіреміз, — деді Өскемен қаласы әкімінің орынбасары Болатбек Мамарбаев.
Іс-шара барысында тыныштық пен тұрақтылықты сақтауға зор үлес қосып жүрген әскери қызметшілер мен құқық қорғау органдарының қызметкерлері Өскемен қаласы әкімінің алғыс хатымен марапатталды.
