Шығыс Қазақстан облысы денсаулық сақтау басқармасының мәліметінше, бүгін Өскемен қаласына Астанадан санитарлық авиация ұшып келді. Арнайы мамандар «Казцинктегі» жарылыстан зардап шеккен науқастардың жағдайын бағалау үшін медициналық мекемеге барды, деп хабарлайды F16.kz.
Дәрігерлер 1983 жылы туған Е.Мұхаметқалиевтің денсаулығын тексерді. Науқасқа «үшінші бел омыртқасының сынуы» диагнозы қойылған. Мамандар оның санитарлық авиация арқылы тасымалдауға жарамды екенін растады. Осыған байланысты пациент бүгін Астанадағы Ұлттық шұғыл медицинаны үйлестіру орталығына жеткізіледі.
Ал екінші зардап шегуші – 1980 жылы туған А.Фарафоновтың жағдайы ауыр күйде қалып отыр. Оған «денесінің 90 пайызын қамтыған термиялық күйік» диагнозы қойылған.
Денсаулық сақтау басқармасының хабарлауынша, ертең, 9 мамырда таңертең Астанадан Өскеменге реаниматолог Бақыт Жарқымбеков пен комбустиолог Жомарт Жалғаспаев қайта келеді. Мамандар науқастың жағдайын тағы бір мәрте тексеріп, оны санавиациямен Астанадағы орталыққа жеткізудің жолын қарастырады.
