Президент Қасым-Жомарт Тоқаев Алатау қаласының ерекше құқықтық режимін айқындайтын конституциялық заңға қол қойды. Бұл жөнінде Ақорданың баспасөз қызметі мәлім етті, деп хабарлайды F16.kz.
Құжатта қаланың инвестициялық тартымдылығын арттыру, инвесторларға ұсынылатын кепілдіктер, салық және бюджет саясаты, сәулеттік талаптар мен жер қатынастарына қатысты мәселелер қамтылған. Сонымен қатар Алатау аумағындағы кәсіпкерлік қызмет пен қоғамдық қатынастар да осы заң аясында реттелетін болады.
Алатау қаласы 2024 жылдың басында Жетіген ауылы маңындағы бірнеше елді мекенді біріктіру арқылы құрылған еді. Кейін былтырғы қыркүйек айында Мемлекет басшысы қалаға арнайы мәртебе беру туралы заңды бекітті.
Ал биыл наурызда өткен референдумда қабылданған жаңа Конституция жобасында жекелеген аймақтарды жедел дамыту үшін ерекше құқықтық режим енгізу мүмкіндігі қарастырылған. Аталған өзгерістер шілде айынан бастап күшіне енеді.
Мамандардың пікірінше, жаңа құқықтық мәртебе Алатаудың экономикалық әлеуетін арттырып, ірі инвестициялық жобаларды жүзеге асыруға және өңірдің инфрақұрылымын дамытуға серпін беруі ықтимал.
