Биыл Шығыс Қазақстанда 16 әлеуметтік нысанның құрылысы аяқталып, қолданысқа берілмек. Сонымен қатар қосымша тағы төрт нысанның құрылысы басталады. Бұл туралы Өңірлік коммуникациялар қызметінде өткен брифинг барысында ШҚО құрылыс, сәулет және қала құрылысы басқармасы басшысының орынбасары Ерназ Мұқатаев мәлімдеді, деп хабарлайды F16.kz.
Биыл аяқтау жоспарланған негізгі 16 жобаның қатарында Риддер қаласындағы 600 орындық орта мектеп бар. Қазіргі таңда нысанның дайындығы 50%-ды құрайды. Мектепті шілде айында пайдалануға беру жоспарланған.
Тағы бір маңызды нысан — Өскемендегі Гематология орталығы. Оның дайындығы 97%-ға жетті. Медициналық мекеме осы жылдың екінші тоқсанында аяқталуға тиіс. Сондай-ақ қазір облыстық Онкология және хирургия орталығының хирургиялық корпусының 1–3 қабаттарын жаңғырту жұмыстары жүргізіліп жатыр. Ол жоспар бойынша жылдың төртінші тоқсанында аяқталуы керек, — деді Ерназ Мұқатаев.
Өңірдегі маңызды жобалардың бірі — облыстық Ана мен бала орталығы стационары ғимаратын қайта жаңғырту. Қазір мекеменің дайындық деңгейі 70%-ға жеткен.
Денсаулық сақтау саласында іске қосылуға тиіс жобалар көп. Оның бірі — облыстық аурухана ғимаратының бір бөлігін жансақтау бөліміне бейімдеу. Қазіргі уақытта нысан толықтай дайын. Сонымен қатар Өскеменде 300 орындық көпбейінді аурухананың құрылысы қарқынды жүргізілп жатыр. Құрылыс жұмыстарының 10%-ы аяқталған. Бұл жобаны келесі жылдың үшінші тоқсанында аяқтау жоспарланып отыр, — деп атап өтті облыстық құрылыс, сәулет және қала құрылысы басқармасы басшысының орынбасары.
Алтай ауданы ауданаралық ауруханасы аумағында магниттік-резонанстық томография орналастырылатын ғимараттың құрылысы мен Зайсан ауданы Қаратал ауылындағы дәрігерлік амбулатория құрлысы да аяқталуға жақын. Екі медициналық мекеме де 2026 жылдың екінші тоқсанына қолданысқа берілуі мүмкін.
Ағымдағы жылы бірқатар спорттық және мәдени нысандар да қолданысқа берілуге тиіс. Құрылысы ұзаққа созылған Марқакөл ауылындағы дене шынықтыру-сауықтыру кешенін осы жылдың төртінші тоқсанында аяқтауды жоспарлап отырмыз. Ал, Үлкен Нарын ауылындағы дене шынықтыру-сауықтыру кешенінің дайындығы 35%-ды құрайды. Аяқталуы 2026 жылдың төртінші тоқсанына жоспарланған, — деп атап өтті басқарма өкілі.
Ұлан ауданы Бозанбай ауылында салынып жатқан дене шынықтыру-сауықтыру кешенін де биыл төртінші тоқсанда аяқтау көзделген. Ал, қазіргі күні құрылысы 20%-ға аяқталған Өскемендегі волейбол орталығы 2027 жылдың екінші тоқсанында қолданысқа берілмек.
Өңірдегі мәдениет саласындағы басым жобалардың бірі — Серебрянск қаласындағы №150 корпусты көпфункционалды кешенге бейімдеу. Қазіргі таңда жоба 56%-ға орындалған.
Басым жобалар қатарында тағы төрт маңызды нысан бар. Жаңа Бұқтырмадағы Ұлы Жеңістің 75 жылдығына арналған ескерткіш аумағын абаттандыру жұмыстары 70%-ға аяқталды. Жаңа Бұқтырма кентіндегі кварталішілік жылу желілерін қайта жаңғырту жұмыстары 56%-ға орындалған. Өскемендегі Спорт, Нұрлы жол және 19 тұрғын ауданындағы 4-квартал шағынаудандарын инженерлік-коммуникациялық инфрақұрылыммен қамтамасыз ету жобасының дайындығы 70%-ды құрайды, — дейді Ерназ Мұқатаев.
Ал Риддердің 5-ші шағын ауданындағы 600 орындық мектепке тартылатын сыртқы инженерлік желілер, автотұрақтар мен жолдардың дайындығы әзірге 20% ғана. ШҚО құрылыс, сәулет және қала құрылысы басқармасының мәліметінше, толық қаржыландыру болған жағдайда жобаны 2026 жылдың төртінші тоқсанында аяқтау жоспарланған.
