Өңірдегі мектептердің бірінде кәмелетке толмаған бала құрдастары тарапынан физикалық зорлық-зомбылық көрген. Бұл жағдай туралы «URPAQ» чат-ботына анонимді шағым түскен, деп хабарлайды F16.kz.
Аталған факті бойынша құқық бұзушылыққа оқталушылардың ата-аналарына қатысты ҚРӘҚБтК-нің 127-бабы (Тәрбиелеу жөніндегі міндеттерді орындамау) бойынша әкімшілік хаттамалар толтырылды.
Тарбағатай ауданының прокуратура және полиция қызметкерлері жедел әрекет етіп, жанжал дер кезінде тоқтатылды. Қазіргі уақытта жасөспірімнің өмірімен денсаулығына ешқандай қауіп төніп тұрған жоқ. Оқиғаға қатысушылардың барлығымен және олардың заңды өкілдерімен кешенді профилактикалық және психологиялық әңгіме жүргізілді, — делінген облыстық прокуратураның хабарламасында.
Айта кетейік, Шығыс Қазақстан облысының прокуратурасы 2024 жылы іске қосқан «URPAQ» жобасы балалар мен ата-аналарға буллинг, зорлық-зомбылық және балалар қауіпсіздігіне төнетін өзге де қауіптер туралы анонимді түрде хабарлауға мүмкіндік береді.
«@VKO_URPAQ_BOT» телеграм-боты тәулік бойы жұмыс істейтінін еске саламыз.
