21 мамыр — Мәдениет және өнер қызметкерлері күніне орай өңірдегі сала мамандарына құрмет көрсетіліп, еңбектері бағаланды, деп хабарлайды F16.kz.
Қала сыртындағы «The Forest» мейрамхана кешенінде өткен ерекше мерекелік шараға облыс әкімі Нұрымбет Сақтағанов, зиялы қауым өкілдері, мәдениет және өнер саласының мамандары, кітапхана мен музей қызметкерлері қатысты.
Іс-шара аясында сала үздіктеріне ведомстволық наградалар, Алғыс хаттар мен Құрмет грамоталары табысталды. Аймақ басшысы мәдениет қызметкерлерінің рухани мұраны сақтау, өнерді дамыту және Шығыс Қазақстанның мәдени имиджін нығайту жолындағы айрықша еңбегін атап өтті.
Тамыры терең тарих пен тағылымға бай Шығыс Қазақстан – өнер мен руханияттың алтын бесігі. Әр ұйымдастырылған шара, әр қойылым, әр сурет пен кітап көрмесі – туған өлкеміздің рухани келбетін айшықтай түсетін игі еңбек. Қасиетті Шығыс өңірінің мәдениетін дамыту жолындағы еселі еңбектеріңіз үшін баршаңызға шынайы алғысымды білдіремін, — деді облыс әкімі Нұрымбет Сақтағанов.
Кеш соңында жиналған жұртшылық қазақстандық эстрада жұлдыздары Нұрлан Абдуллин мен Мақсат Рахметтің және жергілікті шығармашылық ұжымдарының қатысуымен ұйымдастырылған концерттік бағдарламаны тамашалады.
Кеш барысында жас таланттарға және Шығыс Қазақстанды республикалық әрі халықаралық деңгейде табысты танытып жүрген шығармашылық ұжымдардың жетістіктеріне ерекше көңіл бөлінді.
