Биылғы оқу жылы да аяқталып, мектеп бітіруші түлектердің алтын ұя білім ордасымен қоштасатын сәті де келіп жетті. Облыс орталығында Оралхан Бөкей атындағы №44 лицейде өткен салтанатты шараға аймақ басшысы Нұрымбет Сақтағанов қатысып, түлектерге сәт сапар тіледі, деп хабарлайды F16.kz.
Аталған білім ордасында 11 сыныпты 44 оқушы тәмамдап отыр
Баршаңызды оқу жылының табысты аяқталуымен құттықтаймын! Өскелең ұрпаққа сапалы білім мен тағылымды тәрбие беру ісінде қажырлы еңбек етіп жүрген ұстаздар қауымына шынайы алғысымызды білдіреміз! Мемлекет басшысы Қасым-Жомарт Кемелұлы Тоқаев білім саласын дамытуға айрықша мән беріп келеді. Білім беру жүйесінде заманауи цифрлық технологиялар мен жасанды интеллект мүмкіндіктерін қолдану және тиімді пайдалану жұмыстары қарқынды түрде жүргізілуде, — деді облыс әкімі.
Бүгін жалпы облыс бойынша 354 мектепте соңғы қоңырау соғылып, 11-сыныпты 5 мыңнан астам түлек аяқтап, үлкен өмірге қадам басты. 494 оқушы «Алтын белгіге» үміткер болса, 439 түлек үздік аттестатқа ұсынылған. Олардың қатарында осы лицей түлектері де бар.
Балаларының бүгіні мен болашағы үшін алаңдап, олардың әрбір қадамына қолдау көрсетіп, бағыт-бағдар беріп келе жатқан ардақты ата-аналар қауымына ерекше ризашылығымызды білдіреміз! Ұл-қыздарыңыз үкілеген үміттеріңізді ақтап, елге адал қызмет ететін, тәрбиелі әрі білімді азамат болып өседі деп сенім артамыз. Құрметті түлектер, адам қандай биік жетістікке жетіп, қандай деңгейге көтерілсе де, ұстазының алдында өмір бойы шәкірт болып қала береді. Өздеріңіз түлеп ұшқалы отырған мектептеріңіз бен аяулы ұстаздарыңызды ұмытпаңыздар, — деп ізгі тілегін білдірді Нұрымбет Сақтағанов.
Соңғы қоңырау соғылған соң аймақ басшысы №44 лицей ғимаратының ішін аралап көрді. 1993 жылы ашылған бұл білім ордасы 2022 жылы қала бойынша «Ең үздік орта білім беретін ұйым» номинациясын иеленген. Жыл сайын жергілікті бюджет есебінен ағымдағы жөндеу жұмыстары жүргізіліп отырады. Нұрымбет Сақтағанов өз сөзінде ШҚО Білім басқармасына лицей ғимаратын қайта жаңғыртудан өткізу үшін жобалық-сметалық құжаттама әзірлеу міндетін қойды.
