Өскемен мектептерінде оқу жылы аяқталып, үздік нәтижеге қол жеткізген оқушылар саны өткен жылмен салыстырғанда көбейді, деп хабарлайды F16.kz сайты.
Қалалық білім бөлімінің мәліметінше, бүгінде қалада 52 мектеп жұмыс істейді. Оның 49-ы мемлекеттік, 3-еуі жекеменшік білім беру ұйымдары.
Биыл Өскемен мектептерінде 48 590 оқушы білім алды. Оның ішінде 3911 оқушы 9-сыныпты аяқтап отыр. Солардың 401-і ерекше үлгідегі аттестатқа үміткер.
11-сыныпты биыл 2410 түлек тәмамдайды. Түлектердің 88 пайызы Ұлттық бірыңғай тестілеуге қатысуды жоспарлап отыр. Олардың 96 пайызы жоғары оқу орындарында білім алуды көздесе, 97 түлек колледждерді таңдаған.
Биыл өңірде 242 түлек «Алтын белгіге» үміткер атанды. Бұл өткен оқу жылымен салыстырғанда едәуір жоғары көрсеткіш. Мәселен, 2025 жылы мұндай үміткерлер саны 189 болған. Сондай-ақ биыл 277 оқушы үздік аттестатқа үміткер болса, өткен жылы олардың саны 215-ті құраған.
Мемлекеттік емтихандар дәстүрлі форматта өтеді. 9-сынып түлектері үшін қорытынды емтихандар 29 мамыр мен 10 маусым аралығында ұйымдастырылса, 11-сынып түлектері 30 мамыр мен 16 маусым аралығында қорытынды аттестаттаудан өтеді.
Толық ақпаратты Өскемен қаласы әкімдігінің ресми сайтынан алуға болады.
Айзада ҚАБДЫҒАЛЫМОВА
