Шығыс Қазақстан облысы сейсмикалық қауіпті өңірлердің бірі саналады. Мамандардың мәліметінше, облыс аумағындағы 75 елді мекен жер сілкінісі қаупі 6-дан 9 балға дейінгі аймақтарда орналасқан, деп хабарлайды F16.kz сайты.
Өңірлік коммуникациялар қызметі алаңында өткен брифингте Шығыс Қазақстан облыстық төтенше жағдайлар департаментінің өкілдері халықтың қауіпсіздігін қамтамасыз ету бағытында бірқатар шаралар қолға алынғанын мәлімдеді. Атап айтқанда, ШҚО мен Өскемен қаласы үшін арнайы сейсмикалық аудандастыру карталары әзірленген.
Жыл басынан бері тұрғындарды төтенше жағдай кезіндегі іс-қимылдарға үйрету мақсатында екі қала мен 11 ауданда түсіндіру жұмыстары жүргізілді. Мамандар тұрғын үйлерді аралап, жадынамалар таратқан. Сонымен қатар қауіпсіздікке қатысты 517 ақпараттық көрсеткіш орнатылды.
Облыс көлемінде 43 мыңнан астам адамды қамтыған 849 сейсмикалық оқу-жаттығу өткізілді. Сондай-ақ төтенше жағдайлар департаментінде 300-ден астам маман арнайы дайындықтан өткен.
Тұрғындарды жедел хабардар ету үшін өңірде 48 сиреналық-сөйлеу құрылғысы жұмыс істейді. Бұдан бөлек, ақпарат 19 цифрлық телеарна мен 13 радиоканал арқылы таратылады.
Соңғы жылдары өңірде «Mass Alert» жүйесі де енгізілген. Бұл жүйе жер сілкінісі тіркелген жағдайда тұрғындардың мобильді құрылғыларына ескерту хабарламаларын автоматты түрде жолдайды.
ШҚО ТЖД мәліметінше, жер сілкінісінің салдарын жоюға арналған арнайы күштер тобы құрылған. Оның құрамында 201 қызметкер мен 50 техника бар. Қажет болған жағдайда Абай, Қарағанды және Жетісу облыстарының азаматтық қорғау күштері де жұмылдырылады.
Мамандар тұрғындарды қауіпсіздік талаптарын сақтап, төтенше жағдай кезіндегі әрекет ету тәртібін алдын ала меңгеруге шақырады.
Ботагөз ЕРЛІК
