Шығыс Қазақстан облысының әкімі Нұрымбет Сақтағанов Риддер қаласындағы жылу электр орталығының жөндеу жұмыстарымен танысты, деп хабарлайды F16.kz.
Аталған нысанға соңғы үш жылда жөндеу-қалпына келтіру жұмыстары жүргізілді. Нәтижесінде негізгі жабдықтардың тозу деңгейі 75,4 пайыздан 45,7 пайызға дейін төмендеген.
Қазір 2026-2027 жылдардағы жылыту маусымына дайындық аясында жөндеу жұмыстары әлі де жалғасып жатыр. Атап айтқанда №5 және №6 жоғары қысымды қазандық агрегаттары республикалық және облыстық бюджет есебінен жөнделуде. Сонымен қатар қаладағы жылу желілерін жаңғырту жұмыстары да қолға алынған.
Облыс әкімі одан кейін қайта жаңғыртылып жатқан Тәуелсіздік даңғылына барды. Қала тұрғындары мен қонақтары үшін жайлы әрі заманауи қоғамдық кеңістік қалыптастыруға бағытталған жоба осы жылдың қыркүйек айында толық аяқталады деп жоспарланып отыр. Қазіргі уақытта жұмыстың 75 пайызы орындалған. Жоба аясында мұнда жаңа жаяу жүргіншілер жолдары салынады. Сонымен қатар жарықтандыру жүйесі жаңғыртылып, инженерлік инфрақұрылымды жақсарту үшін электр кабельдері тартылып, орындықтар қойылып жатыр. Қазір онда 24 адам жұмыс істеп, бес арнайы техника жұмылдырылған.
Аймақ басшысы барлық жұмысты сапалы әрі уақтылы аяқтау қажеттігін жеткізіп, даңғыл бойындағы нысандардың қасбетін де ретке келтіруді тапсырды.
