ШҚО-да балалар көбіне жабдықталмаған жағажайларда шомылу кезінде жарақат алады. Бұл туралы бүгін Өңірлік коммуникациялар қызметінде өткен брифингте облыстық Ана мен бала орталығының травматолог-дәрігері Әділет Қаламов мәлімдеді.
– Біздің травматология және ортопедия бөлімшесіне жыл сайын шамамен 25 мың бала жүгінеді. Көбіне велосипед пен самокат тебу кезінде жарақат алады. Ал демалыспен байланысты жарақаттарға келсек, су айдындарында болатын оқиғалар жиі кездеседі. Балалар жабдықталмаған жерлерде суға басымен секіріп, омыртқа сынуын алады. Сондай-ақ аяқ-қол сыну жағдайлары да жиі болады, – деді Әділет Қаламов.
Оның айтуынша, Ана мен бала орталығында барлық қажетті жабдық республикалық деңгейде қамтамасыз етілген. Дәрігерлер тәулік бойы жұмыс істеп, жарақат алған балаларды қабылдауға әрдайым дайын.
