Күршім ауданының тұрғындары мемлекет қолдауымен баспанамен қамтамасыз етіліп келеді. Тұрғын үймен қамту аудан әкімдігінің басым бағыттарының бірі болып отыр, деп хабарлайды F16.kz сайты.
Қазіргі таңда аудан бойынша тұрғын үй кезегінде 379 адам тіркелген, олардың 200-ден астамы әлеуметтік осал топтарға жатады.
«Бір қабатты Шығыс» бағдарламасы аясында биыл 30 тұрғын үй салу жоспарланған. Құрылыс жұмыстары Алғабас, Күршім, Қыстау-Күршім және Жолнұсқау ауылдарында басталды. Мердігер ұйымдар тек тұрғын үйлерді ғана емес, сонымен қатар қажетті инженерлік-коммуникациялық инфрақұрылымды да жүргізуде.
Сонымен қатар, ауданда ауыз сумен қамту деңгейі 95 пайыздан асты. Биыл Күршім ауылындағы су құбыры желілерін қайта жаңғыртуға 305 миллион теңгеден астам қаржы бөлініп, тиісті жұмыстар басталды.
Күршім ауданында ауыл шаруашылығы экономиканың негізгі драйверлерінің бірі болып қала береді. Мал шаруашылығында барлық бағыт бойынша өсім қарқыны 100 пайыздан асты. Қазіргі таңда ауданда 500 бастан астам ұсақ мал ұстайтын 23 шаруа қожалығы және 100 бастан астам ірі қарасы бар 38 шаруашылық жұмыс істейді.
Биыл 144 шаруа қожалығына жалпы сомасы 153 миллион теңгеден астам субсидия берілді. Сонымен қатар, мемлекеттік бағдарламалар арқылы 9 кәсіпкерге 117 миллион теңгеден астам қолдау көрсетіліп, тағы 11 жоба 200 миллион теңге көлемінде қаржыландыруға ұсынылған. 7 шаруашылық 100 миллион теңгеден астам сомаға техника сатып алған.
Ауданда омарташылық та дамып келеді: 50-ден астам кәсіпкер бал өндірумен айналысып, өнімдерін Астана, Алматы және өңірлерге жөнелтуде.
Инфрақұрылым саласында да жұмыстар жалғасуда. Күршім – Қалжыр – Ақсуат автожолының 37–47 шақырым аралығы жөнделіп жатыр. Сондай-ақ бірнеше ауылда жол жөндеу жұмыстары жүргізілуде.
Білім беру саласында екі мектепке жөндеу жұмыстары жүргізіліп, жаңа пәндік кабинеттер сатып алынды. Бірлік ауылында 50 орындық мектептің құрылысы аяқталуға жақын, ал Қыстау-Күршім ауылында жаңа мектеп құрылысы басталды. Сонымен қатар, Күршім ауылында 140 орындық «Дара бала» балабақшасы пайдалануға берілді.
Қоғамдық қауіпсіздік бағытында да оң динамика байқалады: биыл тіркелген қылмыс саны 25 пайызға азайған, ал қоғамдық орындарда қылмыс тіркелмеген.
