Марқакөл ауданында жол инфрақұрылымын жаңғырту бойынша ірі жобалар қолға алынбақ. Қазіргі уақытта аудандық маңызы бар екі маңызды автожолды орташа жөндеуге арналған жобалық-сметалық құжаттамалар әзірленіп жатыр, деп хабарлайды F16.kz сайты.
Бұл туралы аудан әкімі Рүстембек Кемешев Өңірлік коммуникациялар алаңында өткен брифинг барысында айтты.
Атап айтқанда, «Омбы – Майқапшағай – Теректі – Игілік – Шеңгелді» автомобиль жолының 30-45 шақырым аралығын жөндеу жоспарланған. Жобаның алдын ала құны – 1,35 млрд теңге.
Сонымен бірге «Күршім – Қалжыр – Ақбұлақ – Қарой – Ашалы – Қайнарлы» автожолының алғашқы 12 шақырымын жөндеу көзделген. Бұл жобаның болжамды құны 1,08 млрд теңгені құрайды.
Бұдан бөлек, биыл аудандық бюджеттен жергілікті маңызы бар 170 шақырым жолды күтіп ұстау және шұңқырлы жөндеуге 156 млн теңге бөлінді. Қазақстан ауылына кіреберіс 2 шақырым жолды жөндеуге тағы 20 млн теңге қарастырылған.
Сондай-ақ Урунхайка ауылындағы туристік-рекреациялық аймаққа апаратын жолдың 2 шақырымы жөнделмек.
Жолдарды жаңарту тұрғындардың қатынасын жақсартып қана қоймай, туризм мен шекаралық өңірдің экономикалық дамуына серпін береді деп күтілуде.
