VІІІ шақырылған Шығыс Қазақстан облыстық мәслихатының кезекті ХХІХ сессиясында жылдық жұмыс қортындыланып, қабылданған шешімдер мен көтерілген мәселелердің нәтижесі талқыланды, деп хабарлайды F16.kz.
Облыстық мәслихат төрағасы Денис Рыпаков жұмыс Қазақстан Республикасының Конституциясы, «Қазақстан Республикасындағы жергілікті мемлекеттік басқару және өзін-өзі басқару туралы» Заң талаптарына, мәслихат регламенті мен жоспарға сәйкес жүргізілгенін атап өтті.
Есепті кезеңде облыстық мәслихат 8 сессия өткізді. Оның ішінде 4 кезекті және 4 кезектен тыс сессия ұйымдастырылып, жалпы саны 68 шешім қабылданды. Соның 24-і нормативтік құқықтық сипаттағы құжаттар болды. Сессияларда облыстық бюджеттің игерілуі, денсаулық сақтау саласын дамыту, цифрландыру және жасанды интеллект жобаларын іске асыру, гидротехникалық құрылыстардың қауіпсіздігі, 2025–2026 жылғы жылу беру маусымына дайындық және Күршім ауданында сыбайлас жемқорлыққа қарсы заңнаманың орындалуы мәселелері қаралды, — дейді Денис Рыпаков.
Сондай-ақ өткен жылы Шығыс Қазақстан облысының 2026–2030 жылдарға арналған даму жоспары бекітілді. Құжатта өңірдің төрт негізгі даму бағыты бойынша 115 индикатор мен көрсеткіш белгіленген. Сонымен қатар есепті кезеңде облыстық бюджет алты рет нақтыланып, қаржы бірінші кезектегі әлеуметтік және экономикалық міндеттерді шешуге қайта бөлінді.
Сессия барысында облыстағы жалпы су пайдалану қағидалары бекітіліп, елді мекендердің жасыл желектерін құру, күтіп-ұстау және қорғау ережелеріне өзгерістер енгізілді. Есепті кезеңде облыстық мәслихаттың тұрақты комиссияларының 6 отырысы өткізіліп, олардың қорытындысы бойынша мемлекеттік органдарға ұсынымдар жолданды. Қазіргі уақытта облыстық мәслихаттың 16 шешімінің орындалуы тұрақты комиссиялардың бақылауында, — деп атап өтті мәслихат төрағасы.
Оның айтуынша, депутаттардың халықпен жұмысы да жүйелі түрде жалғасты. Бір жыл ішінде олар 207 кездесу мен жиналыс өткізіп, 235-тен астам азаматты жеке қабылдаған. Кездесулер барысында тұрғындар тұрғын үй-коммуналдық шаруашылық, жол және көлік инфрақұрылымы, әлеуметтік қорғау, жұмыспен қамту және басқа да маңызды салаларға байланысты 468 мәселе көтерді. Азаматтардың өтініштерін шешу мақсатында депутаттар түрлі мемлекеттік органдарға 226 депутаттық сауал жолдады.
Сессия қорытындысында Денис Рыпаковтың есебі назарға алынып, облыстық мәслихаттың жұмысын одан әрі жетілдіруге бағытталған бірқатар міндеттер айқындалды. Атап айтқанда, депутаттардың белсенділігін арттыру, халықпен және мемлекеттік органдармен өзара байланысты күшейту, мәслихат шешімдерінің орындалуына бақылауды жалғастыру, шешім жобаларын сапалы әзірлеу, аппарат қызметкерлерінің кәсіби біліктілігін арттыру және барлық деңгейдегі мәслихат депутаттарын оқыту жұмыстарын жалғастыру ұсынылды.
Сондай-ақ облыстық мәслихат депутаттарына өңірдің әлеуметтік-экономикалық даму бағдарламаларын тиімді іске асыруға бағытталған жұмысты жалғастырып, Мемлекет басшысының барлық деңгейдегі мәслихат депутаттарының III республикалық форумында берген тапсырмаларын жүзеге асыруға белсенді қатысу ұсынылды.
