Саяси додаға түсетін 7 партия өкілдері сайлаушылармен кездесіп, өңірге қарасты аудан-қалаларды аралап, үгіт-насихат жұмыстарын белсенді жүргізіп жатыр. Сайлауалды тұғырнамасын таныстырумен шектелмей, бұқараның мәселесіне құлақ түріп жүр.
«Әділет» партиясының өкілдері Өскемендегі «Рейтинг» ЖШС ұжымымен кездесті. 30 жылдан астам тарихы бар кәсіпорын шығыстағы ақпараттық технологиялар саласындағы жетекші компаниялардың бірі. Серіктестік өңірдегі мемлекеттік және жекеменшік ұйымдарды IT саласындағы тауарлармен және қызметтермен қамтамасыз етеді. Кездесу барысында штаб өкілдері партияның сайлауалды бағдарламасының негізгі бағыттарымен таныстырып, цифрлық технологияларды дамыту, отандық бизнесті қолдау және IT саласын одан әрі жетілдіру мәселелерін талқылады.
Жалпыұлттық социал-демократиялық партиясының белсенділері тұрғындар арасында ақпараттық-түсіндіру жұмыстарын жалғастыруда. Бұл жолы Глубокое кентіндегі Абай атындағы мәдениет үйінің кітапханасында сайлаушылармен кездесу өтті. Партия өкілдері сайлауалды бағдарламасының негізгі бағыттарын таныстырып, тұрғындардың сұрақтарына жауап берді.
Қазақстан Халық партиясы да тұрғындармен кездесу өткізуді. Өңірлік сайлауалды штаб мүшелері «Өскемен арматура зауыты» ЖШС, «Өскемен ЖЭО» ЖШС және «Востокмашзавод» ұжымымен кездесті. Партия өкілдері кездесуде сайлауалды бағдарламаның негізгі басымдықтарын таныстырып, лайықты еңбекақы, қызметкерлерді әлеуметтік қолдау, тұрақты жұмыспен қамту және еңбек жағдайларын жақсарту мәселелеріне ерекше назар аударды.
«Ауыл» партиясының өкілдері Прапорщиково кентіндегі «Агротех» ЖШС ұжымымен кездесті. Кездесу барысында агроөнеркәсіп кешенін дамыту, ауыл шаруашылығы тауарын өндірушілерді қолдау және саланың тиімділігін арттыру мәселелері талқыға түсті. Бұдан бөлек, партия өкілдері Предгорное орта мектебінде тұрғындармен кездесіп, сайлауалды бағдарламасының негізгі бағыттарын таныстырды. Тұрғындардың сұрақтарына жауап берді.
«Ақ жол» және «Байтақ» партиялары да үгіт-насихат жұмыстарын жалғастырды. Белсенділер ақпараттық материалдар таратып, баннерлер мен үнпарақтар орналастырды. Бұдан бөлек, тұрғындармен түсіндіру жұмыстарын жүргізіп, партиялардың бағдарламалары мен бастамаларын таныстырды.
Өскеменде «Respublica» партиясының өңірлік штабы да белсенді жұмысын жалғастыруда. Науқан аясында үш ірі кәсіпорында кездесу ұйымдастырылып, кәсіпкерлермен, жастармен ашық пікір алмасу өтті. Шараға 500-ден астам адам қатысты. Кездесу барысында өңір тұрғындары үшін өзекті мәселелер талқыланып, қатысушылардың ұсыныстары мен пікірлері тыңдалды. Мұндай формат сайлаушылармен тікелей байланыс орнатуға және ел мен өңірдің даму бағытын бірге айқындауға мүмкіндік береді.
Жалпы, Шығыс Қазақстан облысында саяси партиялардың өңірлік штабтары сайлау науқаны аясындағы жұмыстарын белсенді жүргізіп келеді. Негізгі бағыттардың қатарында еңбек ұжымдары және қала-аудан тұрғындарымен кездесулер өткізу, сайлауалды бағдарламаларды таныстыру, ақпараттық-түсіндіру шараларын ұйымдастыру бар. Мұндай жұмыс форматы партияларға сайлаушылармен тікелей байланыс орнатып, өзекті мәселелерді талқылауға және өңір мен елдің дамуына қатысты ұсыныстарын ортаға салуға мүмкіндік береді.
