Байтоғас ауылының маңындағы Зайсан көлі жағалауының санитарлық жағдайына тексеру жүргізілді. Іс-шара республикалық «Таза Қазақстан» және «Заң мен тәртіп» бастамалары аясында ұйымдастырылды, деп хабарлайды F16.kz.
Естеріңізге сала кетейік, әлеуметтік желілерде жағалаудың маңы санитарлық талаптарға сай келмейтіні, келген демалушылар қоқысты рұқсат етілмеген жерге тастайтыны жайлы видео тараған.
Профилактикалық іс-шаралар барысында мемлекеттік органдардың өкілдері кәсіпкерлер мен демалушыларға түсіндіру жұмыстарын жүргізді. Оларға аумақтың тазалығын сақтау, тұрмыстық қалдықтарды тиісті тәртіппен жинау және шығару, қоршаған ортаны ластауға жол бермеу, сондай-ақ өрт қауіпсіздігі талаптарын сақтау қажеттігі түсіндірілді.
Тексеру қорытындысы бойынша анықталған құқық бұзушылықтарға қатысты заңнамада көзделген шаралар қабылданды. 26 тұлғаға ескерту жасалып, тағы үш құқық бұзушыға Қазақстан Республикасының Әкімшілік құқық бұзушылық туралы кодексінің 505-бабына сәйкес әкімшілік айыппұл түріндегі шара қолданылды, — делінген аудан әкімдігінің ақпаратында.
Сонымен қатар кәсіпкерлер мен жергілікті тұрғындардың қатысуымен жағалау аумағында санитарлық тазалық жұмыстары жүргізілді. Тұрмыстық қоқыс жиналып, қалдықтар шығарылды, жағалаудың жекелеген учаскелерін абаттандыру жұмыстары атқарылды.
Мұндай іс-шаралар қоршаған ортаға Зайсан көлінің жағалау аумағының санитарлық жағдайына бақылау жұмыстары жалғасады. Тазалықты сақтау, қоғамдық тәртіпті қамтамасыз ету және қауіпсіздік талаптарының орындалуы тұрақты бақылауда болады.
