Шығыс Қазақстан облысында зейнет жасына жақындаған азаматтардың жұмыспен қамтылуына, еңбек жолын жалғастыруына мүмкіндік беретін «Күміс жас» жобасы жүзеге асырылуда. Жобаға зейнет жасына әлі жетпеген, 50 жастан асқан жұмыссыз азаматтар қатыса алады, деп хабарлайды F16.kz ШҚО әкімінің баспасөз қызметіне сілтеме жасап.
Жобаға қатысу үшін Enbek.kz, eGov.kz арқылы жұмыссыз ретінде тіркелу немесе мансап орталығына жүгіну қажет.
Жұмыс беруші қатысушыны жұмысқа қабылдап, оған жалақы төлейді. Бұл ретте мемлекет жұмыс беруші шығындарының бір бөлігін субсидиялайды. Бірінші жылы субсидия мөлшері жалақының 70%-ына дейін, екінші жылы – 65% және үшінші жылы 60%-ына дейін болуы мүмкін. Бұл ретте төлем 30 АЕК-пен шектеледі.
Жобаға қатысу мерзімі – үш жылға дейін. Субсидиялау кезеңі аяқталғаннан кейін қатысушының зейнет жасына жеткенге дейін тұрақты жұмыс орны сақталуға тиіс.
Жыл басынан бері облыс бойынша «Күміс жас» жобасы аясында 375 адамды жұмысқа орналастыру жоспарланған. Бүгінде олардың 363-і жұмысқа қабылданды. Осылайша, жоспар 97%-ға орындалды, — делінген әкімдіктің хабарламасында.
Жоба аға буын өкілдерінің еңбек нарығында сұранысқа ие болып, табысын және кәсіби дағдыларын сақтап қалуына, ал жұмыс берушілерге жұмыс орындарын құру кезінде қосымша қолдау алуға мүмкіндік береді.
