Өскемендік оқушылар логопедтердің жұмысын жеңілдетуге арналған жасанды интеллект негізіндегі InSөz.ai жобасын әзірледі. Жоба қазір Шығыс Қазақстандағы екі мектепте пилоттық режимде сынақтан өтіп жатыр, деп хабарлайды F16.kz.
InSөz.ai жобасының идеясы логопед мамандарының күнделікті жұмысын зерттеуден басталған. Команда облыстық білім басқармасымен бірлесіп, 100-ден астам маман арасында сауалнама жүргізген.
Зерттеу барысында логопедтердің жұмыс уақытының шамамен 40 пайызы қайталанатын тапсырмаларға, соның ішінде сөйлеуді талдау, есеп дайындау және ұсыныстар әзірлеуге жұмсалатыны анықталды. Осы мәселені шешу үшін оқушылар жасанды интеллектіні қолданатын арнайы құрал әзірлеп шықты. Бұл жүйе баланың сөйлеуін талдап, алынған мәліметтер негізінде маманға есеп пен ұсыныстар дайындауға көмектеседі. Жобаның негізгі мақсаты – логопедті алмастыру емес, оның уақытын үнемдеп, баламен тікелей жұмыс істеуге көбірек мүмкіндік беру, — дейді облыстық білім басқармасының баспасөз қызметі.
Қазір InSөz.ai «АқНиет» ерекше білім беру қажеттіліктері бар балаларға арналған мектеп-интернатында және №8 мектеп-интернатында пилоттық сынақтан өтіп жатыр. Жоба авторлары нақты мамандардың кері байланысын ескере отырып, жүйенің мүмкіндіктерін жетілдіруді жалғастырмақ.
Жас өнертапқыштардың жобасы бірқатар байқауларда да жүлделі орындарға ие болған. Атап айтқанда, InSөz.ai Infomatrix Asia 2026 халықаралық байқауында қола медаль иеленді. Сонымен қатар команда Startup Orda бағдарламасын сәтті аяқтап, Pizza Pitch байқауында 40 мың теңге, Idea Battle сайысында 200 мың теңге көлемінде жүлде алған. Жобаның дамуына Oskemen Hub та қолдау көрсетіп келеді.
InSөz.ai командасының құрамында Amina Adilkyzy – CEO, Adiya Tatanova – COO, Tamerlan Omralinov – CTO, Insar Mastikbayev – CFO және Nadir Nimatulin – Developer қызметін атқарады.
Жоба авторлары алдағы уақытта InSөz.ai жүйесін жетілдіріп, оны логопедтер мен арнайы білім беру саласының мамандарына арналған толыққанды цифрлық құралға айналдыруды жоспарлап отыр.
