Өскеменде көрнекті мемлекет және қоғам қайраткері Бердібек Сапарбаевты еске алуға арналған футбол турнирі мәреге жетті, деп хабарлайды F16.kz.
Бұл — әуесқой футбол командалары арасындағы IV республикалық ашық турнир екенін еске саламыз. Доп додасына сегіз өңірден команда келді. Жергілікті сегіз команда және бар. «Восток» стадионында 16 команда екі күн атой салып, кім мықтыны анықтады.
Он алтының ішінен төрт команда суырылып алға шығып, жартылай финалға жолдама алды. Бұлар: Астананың “Арландары”, Абай облысынан келген “Ақсуат-Асылтас”, “Түркістан” командасы және Жетісудың “Барысы”.
Жартылай финалда қарсыластарын қапы қалдырған “Барыс” пен “Ақсуат-Асылтас” ақтық сында шеберлік байқасты. Финалда бірінші болып есеп ашқан жетісулықтар ойын соңына дейін сауатты қорғанып, жеңісті уыстан шығармады. Көрнекті қайраткерді еске алуға арналған республикалық турнир кубогі Жетісу облысы Алакөл ауданының “Достық” станциясына жол тартты.
Екінші орын Абай облысынан келген аяқдопшылардың еншісінде, үшінші жүлде “Түркістанға” бұйырды.
-
Бұл турнирге біз, Ақсуат командасы, екінші рет қатысып отырмыз. Өткен жылы үшінші орын алғанбыз. Биыл да командалар тыңғылықты дайындықпен келген. Командалық жұмыстың арқасында екінші орынға ие болдық. Жалпы турнир жоғары деңгейде ұйымдастырылған, — дейді турнирдің үздік ойыншысы атанған Әділет Иманалиев.
Жарыс жеңімпазы мен жүлдегерлерін Шығыс Қазақстан облысының әкімі Нұрымбет Сақтағанов, Бердібек Машбекұлының жұбайы Қалдығайша Зейноллақызы мен көрнекі қайраткердің шәкірттері марапаттады.
«Бүгін белгілі мемлекет және қоғам қайраткері Бердібек Машбекұлы Сапарбаевты еске алуға арналған турнир өз мәресіне жетіп отыр. Президентіміз Қасым-Жомарт Тоқаев кәсібилік пен адалдықты басты қағидат етуіміз керектігін әрдайым атап өтеді. Бұл қасиеттер Бердібек Машбекұлының бойынан табылған еді. Биыл төртінші рет ұйымдастырылған жарысқа қатысқан барша спортшыға алғыс айтамын! Мұндай додалар салауатты өмір салтын насихаттап, жастар мен балалардың спортқа бет бұруына жол ашады. Бүгінде облысымызда 1600-ден астам спорт нысаны бар. Өңір тұрғындарының 45 пайызы осы нысандарда спортпен шұғылданып, денсаулығын нығайтып келеді», — деді аймақ басшысы.
Жеңімпаздар мен жүлдегерлерге кубок, медальдар мен ақшалай сыйлықтар табысталды. Атап айтқанда, бірінші орын алған командаға 1 миллион теңге, екінші орын иегеріне 500 мың теңге, ал үшінші орынға 300 мың теңге берілді. Сондай-ақ бірнеше номинация бойынша үздік деп танылғандар жеке марапатталды.
