Қазақстан Премьер-лигасының 29-шы туры аясында«Алтай» мен «Елімай» кездесті, деп хабарлайды F16.kz.
Өскемендегі «Шығыс» стадионында өткен ойын тартысқа толы болды. Алаң иелері 39-шы минутта есеп ашқан еді. Д.Стоисавлевич қақпа сызығынан он бір метр қашықтағы нүктеден мүлт кетпей, айып соққысынан нәтиже шығарды. Алайда бірінші таймның соңында семейлік ұжым таразы басын теңестіріп кетті, көзге түскен — Марин Беланчич.
Ойынның екінші бөлігінде Дарко Додев “Алтайды” тағы да алға шығарған. Көп ұзамай “Елімай” капитаны Рамазан Оразов пенальтиді ұтымды пайдаланып, қақпа торын тулатты. 57-ші минутта тіркелген 2-2 есебі ойын соңына дейін өзгеріссіз қалды.
“Шығыс дербиін” облыс әкімі Нұрымбет Сақтағанов та стадионнан тамашалап, жергілікті командаға қолдау көрсетті.
Шығысқазақстандық команда үшін бұл кездесу маусымның маңызды ойындарының бірі болды. Өз алаңындағы соңғы матч. Дегенмен клубты алда тағы бір ойын күтіп тұр. Нақты айтқанда, 31 қазанда “Алтай” алматылық «Қайратпен» күш сынасады.
