Күршім ауданында тұрғындарды сапалы баспанамен қамту бағытындағы жұмыстар жалғасуда. Биыл «Бір қабатты Шығыс» өңірлік жобасы аясында ауданда 30 тұрғын үйдің құрылысы жүргізіліп жатыр. Оның 11-ін жыл соңына дейін қолданысқа беру жоспарланған, деп хабарлайды F16.kz.
Бұл туралы Күршім ауданы әкімінің орынбасары Сымбат Дүйсенғазин мәлімдеді.
Биыл ШҚО әкімі Нұрымбет Сақтағановтың қолдауымен Күршім ауданында 30 тұрғын үйдің құрылысы жүргізіліп жатыр. Жыл соңына дейін 11 үйді пайдалануға беруді жоспарлап отырмыз. Жұмыстар кестеге сәйкес жүргізіліп жатыр. Толық аяқталғандары да бар, – деді аудан әкімінің орынбасары.
Жаңа үйлер Күршім ауданында ғана емес, Алғабас, Күршім, Қыстау-Күршім және Жолнұсқау ауылдарында бой көтерді. Мердігерлер тұрғын үймен қатар қажетті инженерлік-коммуникациялық инфрақұрылымды тарту жұмыстарын да жүргізуге міндеттелген.
«Бір қабатты Шығыс» – Шығыс Қазақстан облысында 2020 жылдан бері жүзеге асырылып келе жатқан өңірлік жоба. Оның негізгі мақсаты – бір қабатты тұрғын үйлер салу арқылы баспанаға мұқтаж азаматтарды, оның ішінде көпбалалы отбасылар мен халықтың әлеуметтік осал топтарын тұрғын үймен қамтамасыз ету.
Алғашқы жылдардың өзінде жоба аймақта кең көлемде жүзеге асты. Мәселен, 2020–2022 жылдары жеке инвесторлар есебінен облыста кейіннен сатып алу үшін жалпы ауданы 98 мың шаршы метр болатын 1 050 үй салынған. Олар көпбалалы отбасыларға, халықтың әлеуметтік осал топтарына және білім беру, денсаулық сақтау, басқа да салаларда сұранысқа ие мамандарға берілді.
Кейінгі жылдары да бұл бағыттағы жұмыстар жалғасты. Ресми мәліметке сәйкес, 2022–2024 жылдары Шығыс Қазақстан облысында «Бір қабатты Шығыс» жобасы бойынша 67,4 мың шаршы метр тұрғын үй пайдалануға берілген.
Бүгінде Күршім ауданы бойынша тұрғын үй кезегінде 379 адам тұр. Оның ішінде 200-ден астамы әлеуметтік осал топтарға жатады. Қазіргі таңда аудан әкімдігі «Отбасы банкпен» осы бағытта жұмыс жүргізіп жатыр. Соңғы үш жыл ішінде «Бір қабатты Шығыс» жобасы бойынша 50-ге жуық тұрғын үй салынған.
Жаңа тұрғын үйлерді салумен қатар олардың сапасына да ерекше көңіл бөлінуде. Сымбат Дүйсенғазиннің айтуынша, үйлердің сапасы тиісті құзырлы органдардың жұмыс кестесіне сәйкес тексеріліп, облыстық басқармалар тарапынан да бақылаудан өтеді.
Үйлердің сапасы құзыретті органдар мен облыстық басқармалар тарапынан тексеріледі. Осы уақытқа дейін берген үйлерде шағымдар болды, бірақ барлығы дерлік жөнделді, – деді Күршім ауданы әкімінің орынбасары.
«Бір қабатты Шығыс» жобасының ерекшелігі – тұрғын үй мәселесін шешумен қатар ауылдық елді мекендердің әлеуметтік-экономикалық дамуына да ықпал етуі. Жаңа үйлердің салынуы ауыл тұрғындарының тұрақтап қалуына, әлеуметтік инфрақұрылымды дамытуға және елді мекендердің келешегін нығайтуға мүмкіндік береді.
