25-27 қыркүйек аралығында Шығыс Қазақстан облысының аумағында «Жалған нөмір» рейдтік іс-шарасы өтті, деп хабарлайды F16.kz.
Үш күн бойы полиция қызметкерлері көлік құралдарына мемлекеттік тіркеу нөмірлік белгілерін пайдалану талаптарының сақталуын тексеріп, оларды заңсыз пайдаланудың жолын кесті.
Сондай фактілердің бірі Риддер қаласында анықталды. 32 жастағы қала тұрғыны өзінің «Subaru Forester» маркалы автокөлігіне жалған мемлекеттік нөмірлер тағып жүрген.
Ұқсас факті Тарбағатай ауданының Тұғыл ауылында да тіркелді. 55 жастағы жергілікті тұрғын автокөлігіне жалған мемлекеттік нөмір таққан. Екі жүргізушіге де ҚР ӘҚБтК-нің 590-бабының 3 және 4-бөліктері бойынша әкімшілік хаттамалар толтырылды. Көлік құралдары арнайы тұраққа қойылды, — дейді ШҚО ПД баспасөз қызметі.
Сондай-ақ рейд барысында мемлекеттік нөмірсіз жүрген 13 жүргізуші ұсталды.
Полиция жалған мемлекеттік нөмірлік белгілерін пайдалану немесе мүлде нөмірсіз жүру заңнамада белгіленген жауапкершілікке әкеп соғатынын ескертеді.
