Ұстаз еңбегі – елдің ертеңін қалыптастыратын аса жауапты әрі құрметті қызмет. Осы орайда 5 қазан – Мұғалімдер күніне орай Шығыс Қазақстан облыстық филармониясында білім беру саласының қызметкерлеріне арналған салтанатты жиын ұйымдастырылды, деп хабарлайды F16.kz.
Мерекелік шараға Шығыс Қазақстан облысының әкімі Нұрымбет Сақтағанов қатысып, өңірдегі білім саласының дамуына үлес қосып жүрген ұстаздар мен сала мамандарын кәсіби мерекелерімен құттықтады.
Жиын барысында ұстаздық жолды таңдаған жандардың еңбегі ерекше аталып өтіп, олардың жас ұрпаққа сапалы білім мен саналы тәрбие берудегі рөліне тоқталды. Білім беру жүйесінің жетістіктері мен педагогтердің күнделікті атқарып жүрген маңызды жұмысы да назардан тыс қалмады.
Ұстаз — білім мен тәрбиенің бастауы, ұлт болашағын қалыптастыратын аса жауапты мамандық иесі. Бүгінде білім мен ғылымды дамыту, педагог мәртебесін арттыру — мемлекеттік саясаттың маңызды бағыттарының бірі. Президентіміз Қасым-Жомарт Тоқаев «Мықты мұғалім — сапалы ұлттың тірегі» деп атап өткендей, еліміздің ертеңі ең алдымен білімді, саналы әрі бәсекеге қабілетті ұрпақ тәрбиелеуге тікелей байланысты. Қадірлі ұстаздар, еңбектеріңіз әрдайым жемісті болып, шәкірттеріңіздің жетістігі мерейлеріңізді үстем етсін, — деді аймақ басшысы.
Қонақтарға арналып оқушылар мен колледж студенттерінің шығармашылық жұмыстарының көрмесі қойылды. Сондай-ақ Өскемен қаласының кітапханалары мен кітап дүкендері ұсынған оқу және көркем әдебиет көрмесі көпшілік назарына ұсынылды.
Фойеде «Біздің құттықтауларымызды қабыл алыңыздар» бейнероликтер байқауының үздік жұмыстары көрсетілді.
Мерекелік шара барысында кәсіби шеберлігі, жоғары жауапкершілігі және білім беру ісін дамытуға қосқан үлесі үшін үздік педагогтерге мемлекеттік және салалық марапаттар табысталды. Олардың қатарында білім беру саласында ұзақ жылдар бойы еңбек етіп, жас ұрпақтың сапалы білім алуына және тұлғалық қалыптасуына зор үлес қосып келе жатқан ұстаздар бар.
Атап айтқанда, 3 педагог «Құрмет» орденімен, 4 ұстаз «Ерен еңбегі үшін» медалімен, 3 мұғалім «Еңбек ардагері» медалімен марапатталды.
Сонымен қатар Ы. Алтынсарин төсбелгісі, «Білім беру саласының үздігі» төсбелгісі, облыс әкімі мен ҚР Оқу-ағарту министрлігінің Құрмет грамотасы мен Алғыс хаттары табысталды.
Жиында 2025-2026 оқу жылының қорытындысы бойынша үздік білім бөлімі мен колледж де анықталды. «Жалпы орта білім бойынша үздік білім бөлімі — 2026» атағына Глубокое аудандық білім бөлімі ие болса, Өскемен жоғары политехникалық колледжі жылдың үздік колледжі атанды.
Ары қарай шара концерттік бағдарламамен жалғасты.
Айта кетейік, бүгінде Шығыс Қазақстан мектептерінде 11 мыңнан астам мұғалім жұмыс істейді. Өңірде білім сапасын арттыру, педагогтердің кәсіби дамуына жағдай жасау және олардың еңбегін қолдау бағытындағы жұмыстар жалғасып жатыр.
