Шығыс Қазақстан облысының Глубокое ауылында 56 жастағы жұмысшы тұрмыстық қалдықтарды тиейтін көліктің астында қалып қаза тапты, деп хабарлайды F16.kz.
Бұл оқиға туралы ақпарат әуелі әлеуметтік желілерде тарады. Ондағы мәлімет бойынша, қаза тапқан ер адам арнайы техниканың артында тұрған. Куәгерлердің айтуынша, тиегіш көліктің жүргізушісі жұмысшыны байқамай артқа қарай жүріп кеткен.
Жұмысшы жарақат салдарынан жедел жәрдем келгенге дейін оқиға орнында көз жұмды.
Шығыс Қазақстан облысы полиция департаментінің баспасөз қызметі жұмысшының қаза болғанын растап, қылмыстық іс қозғалғанын хабарлады.
«Полиция департаменті 56 жастағы Шығыс Қазақстан облысының тұрғынының қаза болуына байланысты Глубокое аудандық полиция бөлімінде абайсызда адам өліміне әкеп соққан еңбекті қорғау ережелерін бұзу фактісі бойынша қылмыстық іс қозғалғанын хабарлайды», — деп мәлімдеді ШҚО ПД.
Полиция қазіргі уақытта істің мән-жайын толық, объективті және жан-жақты анықтауға бағытталған барлық қажетті тергеу әрекеттері жүргізіліп жатқанын атап өтті.
