Өскеменде «Әділет» партиясының бастамасымен инклюзивті спортты дамытуға бағытталған «Тең мүмкіндіктер» фестивалінің облыстық кезеңі өтті. Жарысқа өңірдің қалалары мен аудандарынан 17 команда қатысып, бочча, жеңіл атлетика және «Көңілді старттар» бойынша бақ сынады, деп хабарлайды F16.kz.
Фестивальдің басты мақсаты — ерекше білім беру қажеттіліктері бар балаларды қоғамда бейімдеу, өз құрдастарымен командалық ортада өз мүмкіндіктерін сынауына жағдай жасау.
Фестивальдің ашылу салтанатында Шығыс Қазақстан облысы әкімінің орынбасары Айдар Садырбаев спортшыларды құттықтап, балаларға тең мүмкіндік жасаудың маңызын атап өтті.
Бұл қараның ең үлкен жетістігі – балалардың бір-бірін қолдауы, бірге әрекет етуі және өз мүмкіндіктеріне сенуі. Бүгінгі фестивальге қатысқан әр бала – жеңімпаз, – деді «Әділет» партиясы ШҚОФ Саяси жұмыс бөлімінің меңгерушісі Алтынай Жаркенбаева.
Жарыс қорытындысы бойынша Боччадан Өскемен қаласының «Искра» командасы үздік атанса, екінші орынға «Луч» командасы тұрақтады, ал үшінші орын «Атлетико» командасына бұйырды.
«Көңілді старттарда» Ұлан ауданынан келген «Ракета» жеңімпаз атанды. Марқакөлдік «Ақ сұңқарлар» екінші орынды иеленсе, «Шемонаиха 2» командасы үздік үштікті түйіндеді.
Жеңіл атлетикадан үздік үштіктер қатарында Глубокое ауданының «Глубоковское», Күршім ауданының “Мұрагер” және Күршім ауданының “Бірлік” командалары болды.
Облыстық кезеңнің үздік командалары қазан айының соңында өтетін «Тең мүмкіндіктер» фестивалінің республикалық кезеңіне жолдама алды.
«Тең мүмкіндіктер» фестивалі — ерекше қажеттіліктері бар балаларды спортқа тартумен ғана шектелмейтін жоба. Оның аясында балалар бірге жарысып, бір-біріне қолдау көрсетіп, командалық жұмыстың мәнін түсінеді.
