Мемлекет басшысының жарлығы бойынша Қазақстанның Аустрия мен Пәкістандағы елшілері тағайындалды. Бұл туралы Ақорданың баспасөз қызметі хабарлады.
Ермек Көшербаев Қазақстан Республикасының Аустрия Республикасындағы Төтенше және өкілетті елшісі, Қазақстан Республикасының Вена қаласындағы халықаралық ұйымдар жанындағы Тұрақты өкілі лауазымына тағайындалды.
Ермек Көшербаев 1965 жылы 2 мамырда Алматы қаласында дүниеге келген. Киров атындағы Қазақ мемлекеттік университетін және КСРО Сыртқы істер министрлігінің Дипломатиялық академиясын бітірген.
Ол әр жылдары Шығыс Қазақстан облысы әкімінің орынбасары, ҚР Ауыл шаруашылығы вице-министрі, ҚР Сыртқы істер министрінің орынбасары, Қазақстан Республикасының Ресей Федерациясындағы Төтенше және Өкілетті Елшісі, Шығыс Қазақстан облысының әкімі, Қазақстан Республикасы Премьер-Министрінің орынбасары және Қазақстан Республикасының Сыртқы істер министрі қызметін атқарған.
