Өскемен титан-магний комбинатына қосымша электр энергиясы қажет. Кәсіпорынға 2023-2033 жылдарға арналған жаңғырту бағдарламасы аясында 207 млрд теңге инвестиция құю жөнінде жоспар бар, деп хабарлайды F16.kz.
Титан мен магний өндіру үшін едәуір электр энергиясы қажет. Комбинаттың мәліметінше, электр энергиясы құнының өсуі өнімнің өзіндік құнын арттырып, кәсіпорынның одан әрі даму мүмкіндіктеріне әсер еткен.
«Бұл ретте кәсіпорынға 2023-2033 жылдарға арналған жаңғырту бағдарламасы аясында 207 млрд теңге инвестиция құю жоспарланған. Комбинатты электр энергиясымен қамтамасыз ету үшін Өскемен ГЭС-інің мүліктік кешенін оның еншілес компаниясы — «UKTMP Green Power» ЖШС-ға ұзақ мерзімді жалға беру мәселесі пысықталып жатыр. Ұсынылып отырған жалдау мерзімі — 10 жыл, оны ұзарту мүмкіндігі қарастырылған» — деп мәлімдеді ШҚО әкімдігінің баспасөз қызметі.
Талқыланып жатқан шарттарға сәйкес, ГЭС өндірістік персоналының саны мен жалақысы сақталуы тиіс. Сондай-ақ станцияның инвестициялық бағдарламасын қаржыландыру жалға алушының міндетіне жүктеліп, өндірілген артық электр энергиясы Бірыңғай сатып алушыға сатылмақ. Мәміленің түпкілікті талаптары әлі де келісу сатысында.
