Өскемендік «Торпедо» хоккей клубы Қазақстан чемпионаты аясындағы кезекті ойынын «Ақтөбе» командасына қарсы өткізді, деп хабарлайды F16.kz.
Кездесу тартысты өтті. Алғашқы кезеңде есепті «Торпедо» ойыншысы Рифель ашты. Ол Колобов пен Глухихтің нәтижелі пасынан кейін шайбаны қарсылас қақпасына дәл бағыттады. Екінші кезеңде командалар есепті өзгерте алмады.
Шешуші үшінші кезеңде ойын қарқыны арта түсті. Алдымен «Ақтөбе» хоккейшісі Аипов есепті теңестірді. Алайда өскемендік команда ойын тізгінін өз қолына алып, екі шайбамен жауап қатты. Әуелі Данияр Бутенко мен Гусейновтің көмегімен мергендік танытса, артынша Гусейнов Гатиятов пен Даниярдың нәтижелі пасын сәтті пайдаланып, матч нүктесін қойды. Есеп – 3:1, жеңіс – «Торпедо» еншісінде.
Жалпы матч барысында қос команда да белсенді ойын көрсетті. «Торпедо» қақпаға 34 соққы бағыттаса, «Ақтөбе» ойыншылары 31 рет шабуылдады.
Енді «Торпедо» келесі ойындарын 29 және 30 қазанда «Номад» командасына қарсы өткізеді.
